Ministériu Finansas Lansa Rezultadu Prelimináriu Sensu Populasaun no Uma-Kain 2022

MF Lansa Rezultadu Prelimináriu Sensu Populasaun no Uma-Kain 2022

Reportajen: Ermelinda Caet

SCROLL FILA BA NOTISIA

Dili (timorpost.com) – Governu Timor-Leste liuhusi Ministériu Finansas (MF), Rui Augusto Gomes, Tersa (15/11), ofisialmente lansa rezultadu Prelimináriu Sensu Populasaun no Uma-Kain tinan 2022.

“Onra ida mai ha’u, bele marka prezensa iha Auditóriu ne’e, ohin dadeer hodi ofisialmente lansa rezultadu prelimináriu Sensu Populasaun no Uma-kain 2022”, nia diskursu iha Salaun Auditorium, Kay Rala Xanana Gusmão, Ministériu Finansas, Ai-tarak-laran, Tersa (15/11).

Oitavu Governu Konstitusionál liuhusi Diresaun Jerál Estatístika, Ministériu Finansas realiza ona Sensu Populasaun ho susesu. Ida-ne’e mak Sensu Populasaun ba Dahaat depois de restaura Independénsia iha tinan rua-nulu liubá. Primeiru iha 2004, Segundu iha 2010, no Terseiru iha 2015. Sensu Populasaun no Uma-kain ida-ne’e, iha inísiu planeia ba 2020, maibé, la-konsege tanba Governu implementa rejime duodesimu to’o tinan rohan. Impedimentu segundu mak pandemia Covid-19, ne’ebé halo konke Governu impoin restrisaun oioin hodi limita sirkulasaun ema no sasán sira durante tinan 2021.

Lee Mós :

Sensus Uma-Kain no Populasaun 2022 Posibilidade iha Ronde Daruak

Maski ho dezafiu oioin, ho servisu preparasaun kontinua ne’ebé lidera husi Diretór Jerál Estatístika, Elias dos Santos, ohin, iha ona rezultadu Prelimináriu Sensu Populasaun no Uma-kain 2022.

Nia dehan Sensu Populasaun no Uma-kain tinan ida-ne’e mak Primeiru Sensu Populasaun ne’ebé uza instrumentu dijitál (CAPI Android), no mós final Sensu Populasaun realizada durante intervalu tinan-lima. Sensu Populasaun tuir-mai sei realiza iha tinan sanulu (10) oin mai. Ida-ne’e bazeia ba rekomendasaun internasionál.

“Oitavu Governu Konstitusionál tau “EMA” nu’udar sentru ba dezenvolvimentu. Tanba ne’e, hatene loloos estrutura populasaun to’o iha nivel aldeia no suku; distribuisaun no karakterístika husi ita-nia Populasaun rasik mak xave hodi ita bele foti desizaun no trasa polítika públiku ida ne’ebé bele responde ba estrutura populasaun ne’e rasik”, nia hateten.

Haree ba importánsia, iha fulan-Marsu liubá, Konsellu Ministru aprova Rezolusaun Governu N.º 14/2022, 23 Marsu ne’ebé estabelese estrutura administrativa ida ne’ebé responsavel ba realizasaun Sensu Populasaun no Uma-kain 2022 ne’ebé kompostu husi Komisaun tolu, Komisaun Nasionál Sensu 2022, ne’ebé nia Prezidente Komisaun mak Primeiru-Ministru, Jenerál Taur Matan Ruak, Komisaun Tékniku Sensu 2022, ne’ebé nia Prezidente mak Diretór Jerál Estatístika, Elias dos Santos Ferreira; no Komisaun Publikasaun Sensu 2022.

Lee Mós :

SEFOPE Sei Haruka Tan Asistente Adidu Kontrola Traballadór Ilegál

“Hanesan ita hotu hatene, Sensu fornese ita ho dadus atualizadu kona-ba ita-nia Populasaun rasik no ajuda ita responde ba kestaun polítika públiku sira ne’ebé importante. Sensu mós hanesan instrumentu ida ne’ebé ita bele uza hodi verifika realizasaun Planu Estratéjiku Dezenvolvimentu tinan 2011 to’o 2030 no Indicadores Objetivu Dezenvolvimentu Sustentavel (ODS)”, Ministru Rui tenik.

Nia haktuir rezultadu Prelimináriu husi Sensu Populasaun no Uma-kain 2022 rejista total Populasaun hamutuk 1.340.434. Ida-ne’e hatudu katak númeru abitante kontinua aumenta. Husi ultimo Sensu iha 2015, iha aumentu númeru abitante hamutuk 156.792, ho taxa kresimentu anuál 1,8%.

Rezultadu Prelimináriu hatudu katak daudaun ne’e iha uma-kain hamutuk 250.034, ho nia média 5,4 pessoas kada uma-kain – media ida ne’ebé ki’ik uitoan, se kompara ho ultimo Sensu iha 2015 (5,7 pessoas kada uma-kain).

En-termus distribuisaun jeográfika, kapitál Dili mak iha maiór taxa kresimentu anuál 2,7% kompara ho Sensu 2015, no mós iha maiór konsentrasaun populasaun kuaze 324.000 pessoas, tuir kedan ho Ermera (138.000), Baukau (134.000) and Bobonaro (107.000).

Lee Mós :

Rejolve Problema Bee iha Dili no Sansaun ba Konsumidor Ilegal

Se tendénsia kresimentu ida-ne’e mak kontinua nafatin, númeru populasaun iha kapitál Dili sei sa’e dobru (double) iha dékada rua oin mai.

Sertamente, ida-ne’e sei hanesan rezultadu prelimináriu. Relatóriu Final sei publika iha fulan-Abríl 2023, tuir kedan ho análize profunda sobre tema oioin hanesan: Fertilidade no Nupcialidade, Mortalidade, Projesaun Populasaun, Migrasaun no Urbanizasaun, Uma-kain no Kondisaun hela fatin, Forsa Traballu no Atividade Ekonómiku, Defisiénsia, Edukasaun no Literasia, Jéneru, Juventude no Sensu Atlas.

Maski ultimo dés-koberta konfirma deklina iha media taxa kresimentu anuál (husi 2,1% iha 2015 to’o 1,8% iha 2022), Timor-Leste nia taxa kresimentu populasaun anuál aas liu entre rejiaun Sudeste Aziátiku, tuir kedan ho la’ós no Kamboja.

2,352 total views, 6 views today

Oinsa Ita nia Reaksaun iha Notisia Nee?