DILI (timorpost.com) — Sosiedade Sivíl kompostu hosi Asosiasaun HAK ho Asia Justice and Rights (AJAR), konsidera polítika Governu iha Parlamentu Nasionál (PN) vota A Favór ba Orsamentu Jerál Estadu (OJE 2023), ne’ebé atu sosa tan karreta 30 ba deputadu sira konsidera polítika ne’e leilaun povu nia osan de’it.
Husi ne’e mak Asosiasaun HAK, AJAR, no Estudante Ativista ba Direitu Umanus, hakarak hato’o sira-nia preokupasaun no lamentasaun sira liga ho polítika sosa karreta pajero sport ba deputadu na’in-30.
Tuir portavós, Gaspar Tali Besi, hatete husi parte sira nian diskórdia totál ho polítika ne’e nu’udar manifestu ida hodi luta kontra polítika esplorasaun no obskurantismu ne’ebé sei lori injustisa sosiál no hamosu klase berjuista ne’ebé harahun tiha valór luta koletivu ne’ebé uluk hotu-hotu hahi no adora.
“Ami hato’o ami-nia pozisaun sira hanesan ne’e, husu ba PN atu hapara sosa karreta 30 ho Marka Pajero Sport, tanba tempu la oportunu,” Portavós Gaspar relata, liuhusi Konferénsia Imprensa ne’ebé hala’o iha resintu HAK-AJAR Faról, Kuarta (05/10).
Tanba ne’e nia husu ba Prezidente Repúblika, atu veta lei orsamentu ne’e hodi muda fali ba setór importante, util no benefísiu ba povu ki’ik sira.
“Alerta ba povu tomak la bele hili tan Partidu ka Deputadu sira ne’ebé aprova osan 1 millaun, hodi sosa karreta ho marka Pajero Sport ba sira na’in-30, atu kompleta karreta 65”, nia hateten.
Nia hatutan, husu mós ba entidade hotu atu ezije hodi hapara aktu ida ne’e, tanba sei hamosu de’it polítika esbanzamentu no halo tusan ba jerasaun foun iha futuru.
Iha fatin hanesan Koordenadór AJAR, Inocêncio Xavier, hatete kontráriu iha situasaun krize mundiál no afeta iha rai laran no rai ida ne’e iha hela problema boot ba kestaun sira seluk hanesan problema bee moos, edukasaun, saúde no setór defeza ho seguransa. Maibé Parlamentu sira ignora tiha problema ida ne’e no sira tau prioridade mak atu sosa karreta 30 husi OJE 2023 ho 1 Millaun.
“Pergunta mak ne’e karreta foun sosa atu halo saida? Ita sente sokadu ho desizaun Parlamentu Nasionál nian, ne’ebé ita hotu hatene katak, PN reprezentante mak povu hodi trata asuntu importante ba povu Timor-Leste tomak,” Inocêncio dehan.
2,124 total views, 3 views today
Bele hare Video Seluk :
Subscribe to Timorpost
