DILI (timorpost.com) – Prezidente Partidu FRETILIN, Francisco Guterres Lú Olo, rekoopera ona saúde no alta husi Hospital Nasionál Guido Valadares (HNGV), Sábadu (17/09) dadeer ba rezidénsia Faról.
Tuir médiku balun, ne’ebé lakohi públika sai nia naran ba Timor Post, katak Francisco Guterres Lú Olo, alta ona husi Hospital Nasionál Guido Valadares, ohin maizumenu tuku 09 resin ne’e.
“Sim, fila ona ohin dadeer, maizumenus tuku 09 resin, maibé ha’u labele dehan sai nia moras ba ita boot, maibé nia di’ak ona no fila ona ba uma,” hateten doutór ne’e hafoin dada lia ho Timor Post iha, HNGV Bidau Tokobaru.
Nia dehan, moras ne’e família sira bandu no lakohi fó sai nia moras ba iha Públiku, tanba ne’e labele fó sai nia moras saida, maibé importante mak lider Nasionál ne’e bele rekoopera no fila ona ba uma.
“Baixa ka halo tratamentu iha ne’e durante loron lima, no ohin konsege rekoopera no fila ona uma iha dadeer ne’e,” deklara nia.
Enkuantu iha Pájina ofisiál Francisco Guterres Lú Olo, nian ne’ebé Timor Post asesu, dehan Lider Nasionál ne’e di’ak ona no ohin fila ona ba nia rezidénsia.
Iha Pájina ne’e mós dehan, durante loron lima iha HNGV, Lú Olo hetan tratamentu médiku ida di’ak tebes husi komponente hotu ne’ebé hola papél importante iha area oi-oin hodi kontribui ba rekoperasaun Francisco Guterres Lú Olo ne’ebe ho lais tebes.
“Dr. Lu Olo ho nia família agradese tebes ba esforsu sira, atendementu di’ak no apoiu tomak la sura kole husi ekipa médiku espesialista, infermeiras, ekipa laboratorista, ekipa Radiologia, ekipa emerjénsia ne’ebe fó ona asisténsia médiku ida kualidade nune’e kontribui Dr. Lu Olo bele alta lalais,” hateten ilha Pájina ne’e.
Nia mós fó agradese ba alta entidade sira hanesan Prezidente Repúblika, José Ramos Horta, Primeiru Ministru, Taur Matan Ruak, Prezidente Parlamentu Nasionál Aniceto Guterres, Chefe Estadu Maior F-FDTL Tenente Jenerál Falur Rate Laek, família bo’ot husi Partidu FRETILIN, liuliu ba Sekretáriu Jerál FRETILIN, Mari Alkatiri, ne’ebe halo vizita kuaze lorloron, Veteranus, família husi Ossu-Vikeke no Ataúro no maluk sira seluk ne’ebé la temi naran ida-ida nia laran luak hola momentu balu halo vizita, no orasaun sira mak fó mós forsa no korajen ba Lú Olo hodi Rekoopera lalais husi nia moras.
2,494 total views, 3 views today
Bele hare Video Seluk :
Subscribe to Timorpost
