DILI (timorpost.com) – Sekretáriu Estadu Igualdade Inkluzaun (SEII), Maria do Razario, hatete tinan 2022 ne’e sira prevee osan millaun 300 USD, hodi apoiu Feto maluk sira bele halo negósiu ki’ik sira.
“Ami iha orsamentu ba iha Feto maluk sira atu fó apoiu ba sira-nia negósiu, osan ne’e mai husi transferénsia públiku ho ninia rotativu ba iha grupu benefisiáriu sira,” nia hateten iha servisu fatin, Sesta (16/09).
Nia dehan, agora sira iha grupu barak ona husi Feto maluk sira mak sai ona benefisiáriu ba programa ida ne’e, no sei kontinua aumenta ba oin.
“Agora ami iha grupu hamutuk 351, grupu benefisiáriu mak agora sai ona hanesan benefisiáriu, ne’e kompostu husi Munisípiu 12, inklui mós ho Rejiaun Administrativa Espesiál Oekusi Ambeno,” hateten nia.
Governante ne’e subliña, iha grupu sira ne’e balun susesu ona ka sai ona hanesan rotativu ba munisípiu sira seluk, hodi apoiu malu nafatin ba oin.
“Kada grupu ida sira sei hetan osan rihun $200 no iha grupu ne’e bele Feto ho Mane hamutuk, importante mak Feto mak tenke barak liu mane iha grupu laran,” deklara nia.
Iha grupu laran ne’e maizumenus ema na’in-10, entaun Feto bele na’in hitu ka neen hanesan ne’e no Mane mak na’in tolu ka na’in haat de’it.
“Kona-ba negósiu ne’e ha’u hanoin kualkér de’it, importante ita-nia Feto maluk sira halibur malu halo grupu hodi hakarak halo negósiu saida, no sita husi ita apoiu sira,” dehan nia.
3,461 total views, 3 views today
Bele hare Video Seluk :