DILI (timorpost.com) – Estrutura Ikatan Keluarga Silat Putera Timor-Leste (IKS-PTL), deside hodi hapara hotu sira-nia atividade treinamentu iha territóriu nasionál.
“Ami hasai ona ami-nia karta sirkulár interna organizasaun nian hodi informa ba estrutura no klube sira hotu iha territóriu tomak, hodi bele hapara provizóriu atividade treinamentu sira ne’e,” dehan Prezidente IKS-PTL, Silvestre Sufa, liuhusi komunikadu imprensa ne’ebé Timor Post online asesu iha Pájina ofisiál IKS-PTL, Kuarta (07/09).
Nia dehan, estrutura hatún karta sirkulár hodi hapara provizóriu atividade treinamentu sira, atu nune’e koopera ho ekipa operasaun konjunta FALINTIL Forsa Defeza Timor-Leste (F-FDTL) no Polísia Nasionál Timor-Leste (PNTL), atu garante pás no estabilidade iha Timor-Leste.
“Ami hasai karta ne’e bazeia ba despaxu entre Ministériu Interiór no Ministru Defeza númeru 01 / MI-ND/ 1X/ 22, atu halo operasaun konjuntu entre F-FDTL no PNTL, atu garante seguransa iha rai laran,” deklara nia.
Prezidente ne’e reforsa, ho ida ne’e karta sirkulár sira hatún ona ba membru sira hotu no klube sira atu bele suspende provizóriu atividade treinu sira, hodi kontribui ba operasaun konjunta ne’ebé F-FDTL no PNTL atu halo.
Nia mós husu ba membru sira hotu-hotu tenke hakaruk no respeitu despaxu ne’ebé Governu hasai ona atu halo operasaun konjunta, tanba nu’udar sidadaun ne’ebé di’ak tenke kontribui ba desizaun sira Governu nian.
“Husu ba membru sira labele uza atributu ka símbolu saida de’it ne’ebé indika ba símbolu IKS nian, tantu iha Públiku no mós iha Bairru-Laran, membru IKS hotu tenke limita movimentu kuandu laiha nesesidade ne’ebé urjente labele tuur kalan iha Estrada no mós iha bairru laran, no mós limita hemu tua no ba tuir festa ne’ebé laiha nesesidade,” nia alerta.
Tanba ne’e nia husu ba membru IKS-PTL hotu-hotu tenke hakmatek no rona malu hodi garantia pás no estabilidade iha Timor Leste laran tomak.
Enkuantu Governu hasai despaxu konjuntu liuhusi Ministériu Interiór no Ministru Defeza númeru 01 / MI-ND/ 1X/ 22, hatún ona iha loron Tersa Feira (06/0) loraik ne’e no públika ona iha Jornál Repúblika, hodi autoriza FALINTIL Forsa Defeza Timor-Leste (F-FDTL) no Polísia Nasionál Timor-Leste (PNTL) atu halo operasaun konjuntu hodi kontribui ba pás no estabilidade iha rai laran.
Iha karta sirkulár ne’e apela ba membru sira hotu iha territóriu laran tomak hodi suspende lai atividade treinu hahú husi horisehik loron 06 fulan Setembru ba to’o iha loron 27 fulan Setembru, no atividade sira sei nomraliza fali iha loron (30/09).
4,890 total views, 3 views today
Bele hare Video Seluk :