DILI (Timor Post) – Partidu Frente Revolusionáriu Timor Leste Indepedénsia (FRETILIN), sei realiza Kongresu Nasionál iha loron 8-10 fulan Setembru, hodi deside nia estrutura lideransa partidu ba períodu 2022-2027.
Tuir Membru Comite Central Fretilin (CCF), José Agustinho Sequeira “Somotxo”, kongresu ne’e sei iha Pakote rua.
“Ami-nia kongresu ba oin mai ho pakote Rua, ida mak Prezidente CCF, Francisco Guterres Lú OLo ho Sekretariu Jerál CCF, Mari bin Amudi Alkatiri, hosi pakote daruak mak, Tenente Jenerál Reformadu Lere Anan Timur ho Eis Primeiru Ministru, Rui Maria de Araújo”, nia hateten ba Timor Post Online via telefónika, Teresa (06/09).
Nia dehan, sira hili Tenente Jenerál Reformadu, Lere Anan Timur hodi troka nia fatin hanesan kandidatu ba Prezidente partidu iha pakote daruak nian.
“Tuir lolos ha’u mak sai pakote ida ho eis Primeiru Ministru, Rui Maria de Araújo, maibé ha’u dirije fali no rekomenda ba Tenente Jenerál Reformadu, Lere Anan Timur mai prense ha’u-nia fatin”, dehan Deputadu FRETILIN ne’e.
Nia esplika, Estatu CCF la’ós la fó dalan, maibé dehan see mak asume ona órgaun partidu nian, nia bele sai Prezidente Partidu, signifika Lere liu ona, maibé ezemplu Lere foin asume nu’udar membru ida mosu iha tinan 2001, signifika nia labele liu, maibé haree nia mós jerasaun tuan ida, nune’e iha direitu atu asume.
“Ita haree ba Lei partidu nian iha artigu 56, ne’ebé liuhosi perfil Prezidente no Sekretáriu Jerál CCF lá ko’alia ida ne’e, signifika estatu la taka dalan ba nia membru rasik atu sai Prezidente,” nia afirma.
Kongresu refere sei hala’o iha loron 8-10 fualan Setembru 2022, no kongresista sira ne’e mai hosi delegasaun munisipál, no kuaze 900, sira ne’e mak sei vota ba nia lideransa foun.
Nia hateten, sira garante la’o ba oin hosi pakote foun hanesan, tanba Lere Anan Timur ho Rui Maria de Araújo, nu’udar pakote jerasaun foun hasoru ba jerasaun tuan mak hanesan Prezidente CCF Francisco Guterres Lu’OLo ho Sekretáriu Jerál FRETILIN Mari bin Amudi Alkatiri.
“Ita haree sira asume fatin ba dala-haat ona, nune’e husu ba jerasaun tuan sira atu halo reflesaun, katak fó konsiderasaun fali ba jerasaun foun atu empodera fali, tanba ita mai hosi ai-laran ho mensajen ida katak ita hotu iha direitu atu dirije ita-nia aan ba Partidu FRETILIN ne’e rasik”, nia hakotu.
3,807 total views, 3 views today
Bele hare Video Seluk :
Subscribe to Timorpost
