DILI (Timor Post) – Sekretáriu Estadu ba Komunikasaun Sosiál (SEKOMS), Mericio Juvinal “Akara”, ho Sekretária Estadu Igualdade no Inkluzaun (SEII), Maria do Rosario, Ofisialmente Lansa ona relatóriu servisu Konsellu Imprensa iha tinan 2021 nian.
Diretór Ezekutivu Konsellu Imprensa, Rigoberto Monteiro, hatete tinan-tinan Konsellu Imprensa sempre halo lansamentu relatóriu servisu KI nian.
“Ha’u hakarak ko’alia kona-ba relatóriu tinan 2021 nian, iha relatóriu ne’ebé atu halo lansamentu ne’e, iha komponente tolu mak iha laran,” nia hateten iha introdusaun, antes halo lansamentu ba relatóriu refere iha Salaun CNE Kolmera, Sesta (26/08).
Nia dehan, komponente ida kona-ba dezenvolvimentu instituisaun órgaun sira nia servisu no konsellu imprensa plenária ne’e halo saida-saida loloos, nune’e, mós Kada semana sira-nia enkontru deside kona-ba saida-saida no regula saida no Delibera saida-saida. Nune’e mós, iha komponente segundu ne’e kona-ba progresu servisu programatiku sira nian.
“Iha dezenvolvimentu media ne’e la’o oinsá no karteira profisionál hira mak ita entrega ona, media hira mak ita rejistu ona no media hira mak ita notifika ona, jornalista sira mak komete infrasaun étika nian, media hira mak komete infrasaun étika,” nia dehan.
Enkuantu, iha komponente terseiru ko’alia kona-ba relatóriu ba gastu orsamentu iha Konsellu Imprensa nian, ne’ebé tinan-tinan orsamentu mai husi Estadu nian.
“Tanba ne’e, atu promove boa governasaun Konsellu Imprensa sempre Lansa nia relatóriu, la’ós ami liuhusi de’it livru, maibé mós kada tinan aprezenta relatóriu ba Tribunal das Contas atu halo auditóriu ba gastu sira ne’ebé Konsellu Imprensa halo,” nia hateten.
Alende ne’e nia hatete, durante ne’e diretór ezekutivu Konsellu Imprensa, sira mós seidauk hetan notifikasaun husi Komisaun Anti Korrupsaun (KAK) no mós seidauk hetan notifikasaun husi Tribunal Kontas, entaun signifika sira nia gastu di’ak hela, seidauk viola lei korrupsaun nian.
“Ba futuru mós ita la viola, tanba ita tenke promove boa governasaun no kombate korrupsaun iha ita-nia nasaun, ha’u hanoin komponente mak ida ne’e, husi relatóriu ida ne’e tinan ida ne’e ami lansa espera servisu ne’ebé ita hamutuk halo iha futuru kontinua reforsa,” nia hakotu.
2,247 total views, 6 views today
Bele hare Video Seluk :
Subscribe to Timorpost
