Dili (Timor Post) — Konsellu Imprensa (KI), Kinta (25/08), realiza atividade anuál The Dili Dialogue Forum (DDF) 2022, ho tema “Média Challenges in Timor-Leste and Southeast Asia” hodi diskute ou fahe esperiénsia ida mós ba Timor atu tau vizibiliza ninia aan.
Atividade DDF ne’e hala’o hahú husi loron Kinta 25/08/2022 to’o 26/08/2022, iha salaun Laline Larigutu, Komisaun Nasionál Eleisaun, Kolmera.
Tuir prezidente CI, Virgílio da Silva Guterres, hatete Forum ne’e hanesan hotu-hotu hatene katak, ne’e eventu anuál ne’ebé KI halo hahú husi tinan 2017 tesik mai, baibain halo iha fulan Maiu, foin deside ho aniversáriu KI nian ne’ebé monu iha loron (10/05). Mais tanba tinan rua liubá pandemia Kovid-19, hotu-hotu hatene katak KI la konsege organiza, maibé iha de’it diskursu internal ruma ne’ebé KI halo, no iha diskusaun ruma liuhusi Zoom.
“Tinan ne’e, ba dala ida ne’e primeira-vés depois de pandemia Kovid-19, ita konvida bainaka sira ne’ebé baibain sai parseiru iha DDF ne’e, responsavel husi órgaun reguladór komunikasaun iha sudeste Aziátiku, hanesan Indonézia, Tailándia, Myanmar, Filipina. Entaun primeiru-vés mak halo testu veis prezensiál,” Virgílio dehan.
Husi ne’e mós, Prezidente KI ho laran triste, hatete husi Indonézia la konsege mai partisipa, ho razaun katak, iha ultimo minutu, sira haree katak distrisaun ne’ebé Estadu aplika ba Indonézia ne’e sei vale hela, nune’e sira laiha tempu badak liu ba sira atu husu lisensa.
“Forum ida ne’e, estabelese iha 2017, atu serve hanesan fatin hodi fahe malu esperiénsia entre organizasaun reguladór média rejiaun ida ne’e no iha Ázia Pasífiku,” Prezidente Virgílio relata.
Prezidente KI, Virgílio, informa forum ne’e mós la’o kada tinan-tinan, tanba hetan apoiu husi UNESCO, ne’ebé KI hahú asina akordu kooperasaun iha tinan 2017, bainhira sira mai husi Indonézia, entaun kooperasaun ne’e kontinua, nune’e mós Timor kontinua la’o.
KI mós moris iha tinan 2016, hahú ho plataforma órgaun rejionál sira hanesan PER iha Comunidade dos Paises da Língua Portugeza (CPLP) no Ázia nian. Kona-ba Ázia nian ba iha sudeste Aziátiku ho ninia kréditu ne’e makaas liu tan tanba CI sai ko-fundadór ba estabelesimentu rede Konsellu Imprensa sudeste Aziátiku nian.
Rede Sudeste Aziátiku, oras ne’e Indonézia mak kaer hela, loloos ne’e mak ba Myanmar, maibé tanba Myanmar iha problema mudansa polítika iha laran.
“Entaun ida ne’e mak siénsia husi Forum ida ne’e, alende atu diskute ou fahe esperiénsia, ida mós ba Timor atu vizibiliza ninia aan, liuliu iha aspetu média nian, hanesan ita-nia Prezidente Repúblika, dehan ita-nia indise global sempre númeru 1 iha sudeste Aziátiku, no mós iha global, hanesan ita hotu-hotu hatene katak, iha saltu makaas teb-tebes husi 71 ba 17,” Virgílio relata.
Entaun, hotu-hotu kontinua buka hodi organiza eventu sira ne’e atu mantein, para nune’e mensajen ba polítiku sira ou ema sira ne’ebé dala-ruma konsidera média hanesan obstákulu ba sira, nune’e tenke muda obstákulu ba sira hodi sai parseiru krítiku ba polítiku no sosiedade nian, liuliu atu kontribui ba hotu-hotu nia objetivu komún, hodi harii sosiedade demokrátiku Timor nian ne’ebé inkorpora ho rejiaun sira seluk.
1,901 total views, 6 views today
Bele hare Video Seluk :
Subscribe to Timorpost
