DILI (Timor Post) – Sekretária Estadu Igualdade no Inkluzaun (SEII), Maria do Rosário, hatete sira sei kapasita no motiva nafatin Feto sira iha territóriu tomak hodi kontinua partisipa iha eleisaun suku no aldeia sira.
Kona-ba atu halo kapasitasaun ba Feto sira iha área rural, tinan oin sei iha eleisaun tolu, tanba ne’e husu Feto sira atu partisipa.
“Eleisaun ida mak Parlamentár, maibé ida ne’e ita laiha dúvida ona tanba Feto iha ne’ebá 30% ona, eleisaun ida tan mak Munisipál nian no Suku nian,” nia hateten iha Faról, Tersa (23/08).
Tanba ne’e nia dehan, sira kontinua halo kapasitasaun ba Feto sira iha área rural hotu hodi partisipa másimu liután iha eleisaun Xefe Suku nian.
“Ita iha Suku territóriu tomak ne’e hamutuk 400 resin, maibé durante tinan hitu nia laran ne’e partisipasaun Feto sira iha eleisaun suku nian ne’e foin to’o de’it 5%, mak sai Xefe Suku, enkuantu 4% de’it mak sai xefe aldeia,” deklara nia.
Ho ida ne’e mak SEII halo kapasitasaun ba Feto sira oinsá atu foti desizaun iha nivel suku no aldeia sira ninian.
“Ami mós sei fó osan ba iha sosiedade sivíl sira hodi bele ajuda SEII hodi bele motiva Feto sira atu bele partisipa másimu liután iha eleisaun suku nian no seluk tan,” nia informa.
Nia subliña, tanba ne’e agora sira sei hahú daudaun ona halo kapasitasaun ba Feto sira no motiva sira, hodi partisipa iha eleisaun Parlamentár no Suku, tanba eleisaun ba Munisipál sei adia fali tan ba tinan oin mai.
1,669 total views, 3 views today
Bele hare Video Seluk :