Dili (Timor Post) — Estudante Hadomi Natureza Universidade da Paz (UNPAZ), realiza semináriu nasionál hodi komemora Loron Internasionál Juventude ho tema “Ho natureza Juventude agora Lidera iha futuru”.
“Governu Timor-Leste presiza kria kondisaun ne’ebé di’ak atu nune’e grupu arte marsiál sira bele halakon atitude ida ne’ebé laiha valor ba dezenvolvimentu Timor-Leste nian, no fó oportunidade ba ema hotu- hotu atu investe iha setór hotu hodi kontribui ba dezenvolvimentu nasionál”, Sobrevivente 12 Novembru 1991, Manuel Saldanha, hateten bainhira partisipa iha serimónia nasionál, loron internasionál juventude, iha salaun UNPAZ, Manleuana, Sesta (12/08).
Nia dehan, arte marsiál ida uluk la hanesan agora, tanba iha tempu okupasaun indonézia, eziste arte marsiál barak, maibé sira sempre hamutuk, la haree ba rasa no diferente organizasaun maibé nu’udar Timoroan sira kuda metin prinsípiu ida katak hamriik hamutuk luta hodi liberta Patria ida ne’e husi okupasaun Indonézia nia torturasaun.
“Ami-nia prinsípiu fundamental tuir funu na’in FALINTIL ne’ebé konkista ona katak Mate ka Moris ukun rasik a’an”, nia hateten.
Nia haktuir, Ideolojia polítika ida ne’e Timoroan hotu-hotu ne’ebé namkari iha territóriu nasionál hamutuk hodi liberta povu husi liman kro’at invazór indonézia nian.
“Maibé, depois ita restaura independénsia tiha mosu fila fali arte marsiál husi organizasaun Persaudaraan Setia Hati Terate (PSHT), Ikatan Kera Sakti Putra Timor-Leste (IKS-PTL), KORKA, inklui arte ritual 77, haree malu la di’ak”, nia hateten.
Nia dehan, Problema ida ne’e sempre akontese tanba laiha fatin dignu ba grupu arte marsiál sira.
“Xave importante ida maka ita tenke kria torneiu ba sira atu nune’e sira bele espresa sira-nia talentu ho hamenus konflitu iha bairru laran no nasaun”, nia hanoin.
Tan ne’e husu Governu kria kondisaun ba sira hodi bele redús problema ne’ebé buras iha rai ida ne’e, tanba ema hotu kestiona maka’as hahalok sira ne’ebé membru grupu arte marsiál sira halo, di’ak liu arte marsiál sira mai hamutuk para bele kontribui ba dezenvolvimentu iha Timor-Leste hodi fó onra ba martiris sira-nia luta ba independénsia.
“Ha’u-nia mensajen ba joven sira para ona inkilina a’an iha problema, insulta malu, kuidadu a’an di’ak tanba ohin loron husi nasaun barak presiza ita boot sira-nia kontribuisaun liuhusi ita boot nia hanoin sira ne’ebé di’ak innovativu sira”, tenik nia.
Ikus nia afirma, ohin loron infiltrasaun barak husi rai li’ur hodi estraga joven sira no nasaun doben ida ne’e, presiza tebes ema ida-idak eskola ho di’ak para iha futuru bele sai dirijente ida ne’ebé di’ak, doutór ida ne’ebé profisionál no manorin na’in ida ne’ebé hatene foti desizaun.
1,248 total views, 3 views today
Bele hare Video Seluk :
Subscribe to Timorpost
