DILI (Timor Post) – Relasiona ho polítika Governu atu koloka FALINTIL-Forsa Defeza Timor-Leste (F-FDTL), iha fronteira terreste, Fundasaun Mahein (FM) husu Governu tenke kria uluk kondisaun no prepara fasilidade.
Diretor Ezekutivu Interinu Fundasaun Mahein, Abel Amaral, informa buat ida polítika atu kolokasaun F-FDTL iha fronteira ne’e, Konstituisaun fó dalan.
“Ita husu ba Governu kuandu koloka F-FDTL iha Fronteira tenke hanoin mós rekursu umanu no presiza kria fasilidade adekuadu ba sira, atu nune’e sira ba ne’ebá labele iha liman mamuk, hanesan daudaun ita-nia UPF sira enfrenta kona-ba fasilidade no buat sira seluk tan,” dehan nia iha knaar fatin Bairru Grilhos, Kuarta (10/08).
Nia dehan, hakarak F-FDTL sira hala’o knaar iha fronteira ne’e ho dignu.
Nia esplika, tuir polítika ne’ebé iha katak, polísia mak iha oin no forsa F-FDTL mak iha sorin.
“Ita nafatin respeitu desizaun sira husi Governu kona-ba kolokasaun tantu F-FDTL-PNTL, tanba estadu iha ona hanoin tanba sa mak la emidiata koloka F-FDTL iha fronteira ne’e estadu iha hanoin,” nia dehan.
Nia hatutan liu tan, ema hotu-hotu tenke rekoñese sira-nia knaar hala’o iha fronteira ne’e reprezenta estadu, ne’ebé la bele hanoin koloka deit, maibe fasilidade ne’e mak problema.
Tuir nia, F-FDTL nia misaun makk oinsá atu tau matan ba iha fronteira terreste, asegura hakmatek, paz no estabilidade iha rai laran.
“Ami Fundasaun Mahein garante F-FDTL koloka iha ne’ebá konserteza atu asegura soberania estadu nian,” nia hakotu.
1,258 total views, 3 views today
Bele hare Video Seluk :