DILI (Timor Post)- Vise Ministru Negósiu Estranjeiru no Kooperasaun, Julião da Silva, hatete sidadaun sira ne’ebé agora ba toba de’it iha estrda ibun iha Portugál ne’e, ajénsia sira mak tenke responsavel.
“Situasaun agora sidadaun sira hasoru iha Portugál ne’e, Ajénsia mak tenke toma responsabilidade, no grupu ilegál sira ne’ebé haruka sidadaun sira ba ne’e,” nia hateten iha Palásiu Governu, Kuarta (03/08).
Nia reforsa tan, tanba tuir loloos Ajénsia sira kuandu haree sidadaun ida ho Pasaporte nasaun ida nian ba nasaun ida tenke fó tikek ba no mai, maibé agora Ajénsia sira fó de’it ba nian, mai laiha, entaun prezudika sidadaun sira iha ema nia Aeroportu to’o ema deporta fila balun.
“Agora sira ba toba arbiru no terus iha Portugál ne’e Govenu halo mak ne’e, servisu hamutuk ho Govenu nia intelijénsia sira ne’ebé iha hodi buka hatene se mak haruka sidadaun sira ne’e ba,” nia hateten.
Tanba ne’e servisu sira ne’e entrega ba parte PNTL liuhosi servisu investigasaun ninian, ne’ebé agora parte seguransa nia la’o hela, kuandu sira-nia relatóriu tama ona mak foin bele haree oinsá.
“Governu laiha kompeténsia ida atu impede ema ida nia viajen, maibé agora viajen sira ne’ebé ita-nia sidadaun sira ba ne’e dezorganizadu, tanba organiza husi ema ilegál sira balun,” dehan nia.
Ho ida ne’e nia husu ba sidadaun sira, kuandu laiha dokomentus atu ba servisu iha Europa, ka ema ruma dehan sira mak responsavel lori imi ba kuandu laiha kontratu ruma di’ak liu lalika ba no hakmatek.
380 total views, 6 views today
