Dili (Timor Post) – Sekretáriu Estadu Komunikasaun Sosiál (SEKomS), halo aprezentasaun rezultadu Survey Nasionál kona-ba Persepsaun Públika ba Mídia Estatál no Privadu.
Sekretáriu Estadu ba Komunikasaun Sosiál, Merício Juvinal dos Reis “AKARA”, hatete objetivu husi Survey ne’e, atu sukat komunidade nia interese ba asesu informasaun husi mídia estatál no privadu hanesan TV, Rádiu, Jornál diáriu iha nasionál no Munisípiu.
“Tuir dadus ne’ebé husi ekipa survey aprezenta ohin hatudu katak taxa partisipasaun feto no mane nian ba interese asesu informasaun kuaze hanesan ou diferente ki’ik oan loos mane % 51.02 no feto % 48.98”, nia hateten hafoin halo abertura ba aprezentasaun rezultadu survey iha auditóriu PCM-Palásiu Governu, Kuarta, (03/08).
Responsavel ba survey, Carsiliano Oliveira, hatete dadus ne’ebé husi ekipa survey tau atensaun prioridade ba balansu jéneru tanba ne’e taxa partisipasaun feto no mane ba asesu informasaun kuaze hanesan ba mane % 51.02 no feto % 48.98.
“Partisipasaun joven ho idade 17-31 maka domina ho 58.14%, iha survey ida ne’e tanba fasil halo interasaun ho ekipa survey, Ekipa enumerador konsente katak, respondente ho idade grupu ida ne’e maka tarjetu potensiál hodi fornese informasaun”, nia haktuir
Nia hatutan, tuir fali idade 17-31 maka ho idade 31-43, grupu ida ne’e, fasil hodi atinje buka informasaun no normalmente maioria parte disponivel iha fatin servisu, sira-nia partisipasaun maka númeru 2 ho 24.58%. Grupu ho idade seluk ladún hatudu vontade hodi partisipa iha survey ida ne’e ho porsentu ne’ebé menus tebes.
“Iha gráfiku survey ne’e indika katak, estudante sira maka partisipa barak liu, kompara ho profisaun sira seluk ho 45.25%, ho razaun ekipa enomerador fasil dezloka ba eskola fatin hodi halo entrevista ho métodu grupu”, nia hateten.
Profisaun sira seluk enomerador sira halo entrevista ho indivíduu, tanba ne’e maka sira-nia partisipasaun menus kompara ho estudante, maibé profisaun funsionáriu públiku mós hatudu partisipasaun balansu ho estudante ho 25.42%.
Enkuantu kona-ba Profisaun Negosiante no Agrikultór sira hatudu deferénsia uitoan 12.88% no 11.61%. Dadus kona-ba nivel edukasaun nian, haree ba partisipasaun ho nivel edukasaun estudante Sekundária maka domina ho 48.83% liu hotu sira seluk. tuir maka komunidade sira ne’ebé lisensiatura ho 36,53%, tuir maka Pre-Sekundária ho 7.88%, maibé ladún hatudu signifikasaun.
Portantu ba iha Komunidade sira ne’ebé la eskola, ou ladún interesante atu partisipa iha survey ida ne’e no mós difisil atu halo komunikasaun, tanba ne’e partisipasaun menus loos ho 0.76%.
“Enkuantu, tinan kotuk ita lansa ida, iha orienta katak kada fulan neen (6) sobre Persesaun Públika ba ita-nia ezisténsia média. Entaun ida ne’e ba dala-rua, ita espera fulan neen tuir mai kontinua halo. Survey ida ne’e bele ajuda ita, atu hadi’a ita-nia aan di’ak liu, atu bele serve ita-nia leitór sira ho másimu no kualidade aas”, nia hateten.
Nia hatutan, Persepsaun Públika ne’e mós tulun ema sira ne’ebé serbisu iha area komunikasaun ou média, hodi nune’e bele hatene didi’ak forsa iha ne’ebé, frakeza iha ne’ebé, no mós Públiku ninia hakarak loloos ne’e mak saida, ou sira hakarak loloos akompaña asuntu saida, maioria prefere liu akompaña média ida ne’ebé, no mós sira-nia asesu ba informasaun ne’e to’o ona iha nivel ida ne’ebé.
“Ida ne’e la’ós lori negativu mai ita, tanba dala-ruma ita haree rezultadu husi média nian, katak ha’u nian ema ladún akompaña ou média ne’ebá ema akompaña barak liu, ne’e la’ós ida ne’e. Importante ba ita atu ita hatene ita-nia serbisu sira, bazeia ba sira-nia persepsaun,” nia dehan.
Entretantu Timor Post Online asesu katak partisipasaun iha survey ida ne’e husi mídia na’in sira, reprezentante Embaixada Australia iha TL, Diretór ONG FONGTIL, Diretór DNPDML, Diretór CEFTEC, Diretora DNAL, Tékniku Espesializadu SEKOMS, Prezidente CI, Prezidente TPLU no parseiru Dezenvolvimentu sira.
1,955 total views, 3 views today
Bele hare Video Seluk :
Subscribe to Timorpost
