Dili (Timor Post)–Prezidente Repúblika, José Manuel Ramos Horta, rekoñese laiha problema ho komunidade sira ne’ebé hatama proposta ba iha Palásiu Prezidensiál.
Nia hatete, kona-ba proposta 1% ka 2% ne’ebé Prezidente Repúblika, bele ajuda tuir regra no tuir lei, bele ajuda.
Maibé, atu haree ba proposta sira ne’e kompeténsia liu mak Ministériu Solidariedade Sosiál no Inkluzaun (MSSI), Prezidente Repúblika, so bele kolabora ho Governu atu ajuda.
“Portantu ha’u laiha problema ho komunidade sira ne’ebé hatama proposta, tanba iha tinan hirak nia laran ne’e simu karta barak-barak no buka esforsu rezolve mesa-mesak no balun la konsege ajuda,” nia informa hafoin hala’o vizita iha edifísiu SAMES Kampung Alor, Segunda (01/08).
Nia subliña, orsamentu ba apoiu hirak ne’e mak husi Orsamentu Jerál Estadu, ne’ebé tau ba iha Prezidente Repúblika, no iha buat balun ida-idak bele haree orsamentu hodi buka meius tulun komunidade sira tuir responsabilidade hanesan Xefe Estadu.
“Orsamentu Prezidensiál nian, mais Prezidente la’ós Ministériu Solidariedade, ka Ministériu Obras Públika,” nia dehan.
Enkuantu Xefe Estadu, kolabora ona ho Xefe Governu atu apoiu, Governu mak tenke halo.
“Ha’u kolabora ona ho Primeira Ministru, katak apoiu hirak ne’e Governu mak tenke halo, tanba iha orsamentu Prezidente Repúblika ne’ebé iha, la’ós atu halo uma, ka bisnis ruma,” nia hateten.
Maibé, Nia promete sei bele tulun tuir kbiit orsamentu ne’ebé Prezidénsia Repúblika iha.
300 total views, 3 views today
