DILI (Timor Post)- Asian Justice and rights (AJAR) lameta programa Governu nian liuhusi Autoridade Munisípiu Dili, ne’ebe ligadu ho Seguransa ho Jestaun Merkadu Munisípiu Dili (SJMMD), halo ba povu no Komunidade ambulante sira.
Diretór Rede Defensór Direitu Umanu AJAR, Inocêncio Xavier, hatete iha loron hirak liubá, seguransa jestaun merkadoria halo ba povu no Komunidade nu’udar vida ambulante sira ne’e hahalok aat, nune’e hakarak husu ba Governu liuliu Munisípiu Dili.
“Husi parte Munisipiu Dili, presiza fó orientasaun másimu ba membru SJMMD, atu tuir, bainhira halo atuasaun ne’ebé dignu ba ema hotu”, Nia hateten iha Edifísiu HAK, Sesta (08/07).
Tuir Koordenador ne’e, durante sira akompana husi Servisu Seguransa Jestaun Merkadoria iha Munisípiu Dili, bainhira halo atuasaun foti de’it Mak ema nia sasán, maibé bainhira na’in husu tuir no foti laiha dadus konkretu,
Bainhira halo atuasaun, presiza hatene halo tratamentu nu’udar ser umanu, labele foti tuir ida-idak nia hakarak, tanba bainhira halo atuasaun presiza iha orientasaun no servisu tuir regulamentu, nune’e husu ba Governu tenke toma responsabilidade hodi solusiona problema Komunidade ambulante sira iha nasaun laran.
“Ami lameta gurda munisípal Dili, tanba uza fizíku la’ós uza kapasidade no kakutak hodi hasoru maluk Timoroan ne’ebé nu’udar vida ambulante iha Rai laran”, nia dehan.
Tanba ne’e nia husu ba Governu, liuhusi Prezidente Autoridade Munisipál, presiza fó orientasaun ba Guarda Jestor Merkadoria sira, atu sira bele servisu tuir giaun ne’ebé iha.
“Hanesan Defensor Direitus Humanus, husu nafatin ba Governu liuhusi PAM atu halo regras ruma, atu rejista sasán hira mak ita bo’ot sira foti husi merkadu ka iha fatin vendedorismu nian, atu labele hadau fali ema nia sasán hanesan vandalizmu ka koboi kota”, nia lamenta.
Alende ne’e nu’udar membru AJAR, José Moniz, haforsa katak, situasaun ne’ebe akontese hanesan merkadoria livre iha dalan públiku tanba dezempregu, la kria kondisaun polítika públika ne’ebé ho lo’ós, hodi ajuda no sidadaun sira bele moris.
Governu daudaun ne’e tempu to’o ona atu haree kria kondisaun ba nia povu sira, hodi partisipa ativu ba roda merkadoria iha Dezenvolvimentu Estadu nian.
Tan ne’e husu dala ida tan ba Prezidente Autoriadede Munisípiu Dili, relatoriu iha Chega, katak atuasaun hot-hotu ne’ebé uza aprosimasaun ho forsa, agresivu ne’e bandu. Tamba la’ós iha ona tempu atu destroi malu fali, maibé kria kondisaun ida at bele moris ho dignu hodi kontribui ba dezenvolvimenasaun.
1,874 total views, 3 views today
Bele hare Video Seluk :