(Reportajen Cardenio Alves/Editor Mateus da Cruz)
DILI (Timor Post)- Konsellu Imprensa (KI), entrega karteira kredensial movel ba jornalista sira hodi vota movel iha eleisaun Prezidensial ne’ebé sei realiza iha 19 Marsu 2022.
“Karteira kredensial movel ne’e sentidu atu jornalista sira atu vota movel, no bele uza kartaun Ida ne’e hodi vota, maibe la’ós vota dalarua,”dehan, Prezidente interinu KI, Expedito Dias Ximenes, iha Edifisiu Konselhu Imprensa, kintal bo’ot, Sesta, (11/03).
Nia hatete, nudar jornalista tenki respeita ba kode etika jornalismu, tenki sinseiru ba iha kobertura iha tempu eleisaun prezidensial iha fatin hotu-hotu, liu liu informasaun ne’ebé fó sai ba púbiku tenke garante ninia kualidade.
Iha tempu kobertura, jornalista sira tenke hatene ida-idak ninian reesponsabilidade liu-liu bainhira kandidatu balun ko’alia ho liafuan la merese atu publika tenki filtra tiha informasaun ne’e hafoin bele publika.
“Bainhira iha tempu kobertura, presiza garante Ita nia kualidade, produtu jornalistiku, respeita kode etika jornalistiku no halo kobertura ne’ebe diak atu publiku bele tuir informasaun ho saudavel,”nia dehan
Karteira kredensial ne’e jornalista mak iha direitu atu hetan tanba jornalista servisu ba publiku hotu-hotu, la’ós servisu ba kandidatu ka partidu Ida.
Iha mundu jornalismu, jornalista sira iha direitu no liberdade atu halo kobertura ne’ebe diak, hodi responsivu ba nasaun no povu.
Ikus liu nia dehan, konsellu imprensa servisu hamutuk ho UNDP,katak bainhira jornalista sira halo kobertuta mak buat ruma akontese bele liga Mai iha KI, STAE no CNE. (Lee notisia seluk iha jornal Timor Post/asesu youtube Timor Post)
897 total views, 3 views today
Bele hare Video Seluk :
Subscribe to Timorpost
