Dili (timorpost.com) – Mane isin metan, fuuk mutin ona, ne’ebé hatais farda xefe suku nian ho kompletu, hatudu oin midar bainhira haree Jornalista Timor Post ba hakbesik nia ne’ebé altura ne’eba konversa hela ho ninia belun sira seluk, iha edifísiu Komandu Polisia Munisípiu Dili.
Nia maka Gil de Araújo, atuál Xefe Suku Dare, Postu Administrativu Vera Krús, munisípiu Dili.
Iha dada lia ne’ebé Jornalista Timor Post halo ho figura ne’e konta, uluk bainhira sei eskola, nia hakarak sai xefe suku, maibé nia la hetan oportunidade hodi kompete, entaun bainhira remata eskola pre-sekundária, nia hahú aprende lori karreta no sai konsege sai duni kondutór, liuhusi servisu ne’e nia hetan osan para bele sustenta ba nesesidade família uma laran.
Dare-oan ne’e, kada loron nia la baruk aprende oinsá maka lori karreta husi ema seluk, ikus mai nia sai duni motorista, kuaze tinan barak nia laran.
Oan domin husi Martins de Araújo no Ermelinda de Carvalho, ne’e lembra iha kuandu nia sei ki’ik, nia hakarak sai lideransa ida, mesmu ke altura ne’ebá nia rasik seidauk hatene saida maka lideransa ne’e, liuliu sai xefe suku.
La para deit iha ne’e, entaun nia hahú koko no aprende halo observasaun husi ema seluk ne’ebé sai ona lideransa, atu nune’e karik loron ruma nia kandidata-an karik no eleitu, pelu menus iha ona esperiénsia, oinsá maka bele sai lideransa ida ne’ebé diak, onestu no responsavel ba populasaun ne’ebé nia lidera ba.
“Ikus mai buat ne’ebé uluk hau aprende husi ema seluk, lori ha’u ba susesu iha parte balun, maski knaar xefe suku la permanente, maibé ha’u orgullu ho knaar ida ne’e, tanba bele atende komunidade iha kualker tempu, hau prontu atu servi,” Xefe Suku Dare, Gil de Araújo konta bainhira dada lia ho Timor Post, iha edifísiu Komandu Polisia Munisípiu Dili, Kaikoli, Segunda-feira (04/01).
Enkuantu, sai lideransa, tuir nia, tenke iha responsabilidade boot ba populasaun sira iha nia suku laran, atende komunidade sira nia presiza, liuliu trata dokumentu importante ruma, xefe suku tenke atende hodi asina karta ka halo proposta ruma liga ho preokupasaun povu nian iha suku laran, hanesan problema infraestrutura báziku nian, hanesan bee moos, estrada, eletrisidade, inklui dezastre ruma akontese iha suku laran, nu’udar autóridade lokal, tenke prontu.
Portantu, Dare oan ne’ebé moris iha loron 19 tinan 1974 ne’e rasik, hahú ninia estudu iha Primária Públiku Dare, iha tinan 1985-1990, Ppre-sekundária Públiku Dare, iha tinan 1990-1993.
Hafoin akab husi pre-sekundáriu, Gil la kontinua ba sekundáriu, tanba inan- aman kbiit la to’o, inan–aman rasik hanesan vida agrikultura, entaun susar ba sira atu hetan rendimentu ne’ebé permanente, entaun obrigadu, Gil tenke to’o deit iha pre-sekundáriu, no nia koko buka servisu de’it ona, mesmu ke la serteza katak nia atu hetan servisu ho nivel edukasaun ne’ebé baixu, maibé ida ne’e la hamate ninia vontade, halo esforsu, ikus mai nia bele hetan susesu, hanesan ohin loron sai xefe suku iha suku Dare.
Mane isin metan ne’e, konxiente katak ninia inan-aman vida agrikultura, entaun nia labele hein de’it sira maka buka osan hodi sustenta ba nesesidade uma laran, inklui responde ba lia mate no lia moris nu’udar ema Timor ne’ebé moris ho kultura.
Entaun, nia deside ba iha munisípiu Vikeke hodi aprende sai motorista, iha tinan 1991-1998, hafoin hatene nia deside fila- fali ba Dare hodi buka fali servisu, ikus mai konsege hetan servisu iha Komisaun Justisa no Pás, hanesan motorista, iha tinan 1999-2010, depois ne’e nia sai iha Komisaun Justisa no Paz hodi buka fali servisu iha fatin seluk ho esperiénsia ne’ebé nia iha ona.
Ikus mai, tanba Maromak nia tulun, nia hetan fali servisu iha Kompañia Lisun, hanesan motorista, no iha tinan 2010-2017, nia hakarak kompete fali iha eleisaun suku, entaun nia kandidata-an ba xefe suku, nufim nia hetan konfiansa husi komunidade iha suku refere, eleitu sai xefe suku hodi lidera suku refere, hahú iha tinan 2017 to’o mandatu hotu iha tinan ida ne’e, no depende ba komunidade sira maka termina fali iha eleisaun tuir mai ne’e.
“Ha’u kandidata an ba xefe suku ho kolega na’in haat, hamutuk ho ha’u, ami na’in lima, iha ronde dahuluk, la konsege pasa, iha altura ne’ebá tama fali iha ronde daruak, ha’u ho kolega ida maka kandidata an, ikus mai hetan konfiansa husi povu, sai hanesan lideransa iha suku refere hodi tau matan no kontrolu komunidade sira iha suku refere to’o ohin loron,” Gil hateten.
“Ha’u kontente ho knaar ne’e xefe suku nian maski la permanente maibé bele hetan konfiansa husi povu sira sai lideransa hodi lidera suku refere kuaze tinan lima nia laran maski hasoru dezafiu oi-oin maibé la impede atividade suku nian”, nia apresia
Enkuantu, Dili oan ne’e hatutan, sai xefe suku tenke iha responsabilidade moral atu kontrolu komunidade sira labele mosu konflitu no mós rona komunidade nia preokupasaun hodi ba hato’o iha nivel nasionál hodi buka solusaun hodi bele responde ba problema hirak ne’ebé komunidade sira enfrenta iha baze.
Portantu, sai lideransa tenke ho fuan boot simu ema hotu nia ideia hodi hato’o ba iha postu administrativu to’o iha nivel nasionál hodi buka solusaun hodi bele responde imediata.
Ikus liu, mane isin metan ne’e konta, papél xefe suku nian maka halo atendimentu ba komunidade atu trata dokumentu ruma ne’ebé komunidade presiza, aleinde halo proposta relasiona ho preokupasaun povu nian iha suku refere hodi relata ba iha nivel altu sira hodi buka solusaun.
Nune’e, Gil ho nia fuan sorin Marquita de Araújo, hanesan dona de casa, sira na’in rua iha oan na’in –lima, oan boot eskola iha Universidad da Paz (UNPAZ) no oan daruak iha Universidade Nasionál Timor-Lorosa’e (UNTL) no oan datoluk eskola iha sekundária no oan dahaat eskola iha pre-sekundária.
3,907 total views, 3 views today
Bele hare Video Seluk :
Subscribe to Timorpost
