Timor Post (17/11/2020)—Ministra Negósiu Estranjeiru no Kooperasaun (MNEK), Adaljiza Magno hatete, preparasaun tékniku kona-ba adezaun Timor Leste ba Association of Southeast Asian Nations (ASEAN) kuaze hotu ona, agora tama ba afirmasaun polítika.
“Ita nia prosesu preparasaun tékniku hotu ona, agora oinsá ita bele halo asaun polítiku, afirmasaun polítiku ida, nivel altu, nivel ministru sira ba leten, oinsá ita bele halo diálog ho país ASEAN sira hodi haree ita nia preparasaun ba sai membru permanente ASEAN nian,” Ministra Adaljiza subliña ba Jornalista sira hafoin reuniaun ho Primeiru Ministru Taur Matan Ruak kona-ba assuntu ne’e, Tersa (17/11/2020).
Adaljiza dehan, prosesu hotu ne’ebé la’o hatudu Timor Leste prontu kolabora atu sai membru ASEAN nian.
Nia hatutan, ba oin presiza halo diálogu ho membru tuan ASEAN nian. Meius sira maka liuhusi vizita offisiál sira, bele via telefone ka vídeo konferénsia.
Tuir ajenda, diplomata feto foinsa’e ne’e informa, iha loron 7 to’o 9 Dezembru tinan ne’e finaliza pilar ekonomia.
Atualmente membru permanente ASEAN hamutuk 10 kompostu Indonézia, Malázia, Singapura, Brunei Darussalam, Thailand, Filipina, Cambodia, Vietnam, Myanmar no Laos.
Entretantu governante ne’e subliña, impaktu husi moras daet COVID-19 boot tebes iha prosesu hirak ne’e.
“COVID ne’e halo buat hot-hotu para, ne’ebé ha’u labele informa buat seluk tan. Iha fronteira de’it taka,” Ministra Adaljiza salienta.
Tuir planu, Ministra Adaljiza sei hasoru mós Prezidente Parlamentu Nasionál ho parte sira relevante hodi informa prosesu tomak kona-ba adezaun ba ASEAN.
Sorumutu hanesan hala’o dahuluk ho Prezidente Repúblika. (jmy/cao)
1,011 total views, 9 views today
Bele hare Video Seluk :
Subscribe to Timorpost
