DILI— Governu Timor-Leste (TL), liuhosi Ministériu Negósiu Estranjeiru no Kooperasaun (MNEK), diskute ona ho parte Indonézia nian kona-ba movimentasaun transporte terrestre ne’ebé sei sirkula iha fronteira.
“Ita ho indonézia ko’alia ona kona-ba bus-kota ka karreta sira ne’ebé atu halo movimentasaun iha fronteira husi kupang mai timor no timor ba Kupang,” hatete Diretór Jerál Asuntu Bilaterál MNEK, Domingos Savio, ba Timor Post iha Timor Plaza Komoro, segunda (09/12).
Nia hatete, sira ko’alia asuntu movimentasaun no hamosu mós idea ne’ebé atu fasilita dezenvolvimentu ekonomia iha rai laran no iha rai sorin.
Diretór Jerál Asuntu Bilaterál ne’e haktuir, diskusaun ne’e au-mézmu tempu fahe mós idea ba malu kona-ba pas no estabilidade hodi kesi rai rua ne’e ba oin hamutuk.
Tuir nia katak, timor iha rai sorin mai sei moris di’ak no iha sorin ba sei moris di’ak, tanba relasaun rua importante iha fronteira ne’ebá.
“Idea hirak ne’e ita bolu integrasaun regional, maibé prioridade ba entre Timor-Leste ho Indonézia, nune’e fasilita prosesu dezenvolvimentu ekonomia iha rai rua,” nia ko’alia.
Nia esplika, antes ne’e governu liuhusi Konsellu Ministru aprova ona vistu livre, maibé la’ós livre ba ema sérviu, livre ba ema turista sira, nune’e mós timor uza vistu livru ba Indonézia la’ós ba servisu, maibé ba vistu turista.
“Ita hatene sidadaun indonézia tama mai timor barak, maibé sira la’ós mai halo negósiu maibé turista,” tenik nia.
Tan ne’e nia dehan, turista atu tama mai Timor la presiza mai husi nasaun dook sira, maibé nasaun viziñu sira hanesan Indonézia mós ema barak hela, ema hirak ne’e bainhira vizita timor fulan ida signifika ne’e ajuda ona ekonomia Timor. (res)
730 total views, 6 views today
Bele hare Video Seluk :
Subscribe to Timorpost
