ADVERTISEMENT

Prezidente Repúblika fó Parabens ba FAO iha Selebrasaun Loron Mundial Ai-han

Timor Post - Internasional
  • Share

Timor Post (16/10/2020)—Prezidente Repúblika Francisco Guterres Lú Olo fó parabens ba FAO nu’udar ajénsia internasional ida tau matan ba ai-han no agrikultura, ne’ebé selebra ninia aniversáriu ba dala hitu nulu resin lima, iha 16 outubru 1945.

Tinan haat nulu liubá, iha loron aniversáriu FAO nian, ONU deside hatuur 16 outubru, nu’udar Loron Mundial Ai-Han / Dia Mundial da Alimentação.

Inisiativa selebra mós Loron Mundial Ai-Han iha Timor-Leste hahú husi Diretor-Jeral FAO nian iha Dili. Tema ba tinan ida ne’e mak “Kuda, Haburas, Sustenta. Hamutuk. Ita-nia lala’ok ohinloron mak ita-nia futuru”

Timor-Leste simu eventu ida ne’e nu’udar Estadu-Membru ONU nian no partisipa ho lala’ok oin-oin ne’ebé permite fahe liután informasaun ba ita-nia ema kona-ba nesesidade atu hasa’e produsaun, prodús ai-han oin-oin liután no ho kualidade, oinsá han di’akliu, atu ita-nia ema bele moris saudável ohinloron no abanbairua.

Lú Olo liuhusi mensajen ne’ebé Timor Post asesu haktuir, tanba eventu selebrasaun ne’e ko’alia kona-ba ai-han, nia-nia neon halai kedas ba maluk agrikultor sira, ita-nia produtór primáriu, liuliu ba sira ne’ebé moris ho susar oin-oin iha área remota no seidauk simu ka simu apoiu oituan de’it husi Governu. Tuir Relatóriu kona-ba IGF, Índise Global ba Hamalaha 2020, Timor-Leste tama iha lista rai sira ne’ebé hamalaha no ho má-nutrisaun as tebetebes. Ida ne’ e problema boot ne’ebé ita hotu tenke rezolve. Entre kauza oin-oin, faktor boot liu mak agrikultor barak la iha asesu beibeik ba irrigasaun no ema oituan de’it mak prodús. Governu sira uluk ladún fó atensaun ba produsaun. Governu ida ne’e iha kompromisu atu apoia agrikultor sira hodi hasa’e produsaun no produtividade.

Maluk timoroan hotu-hotu!.

Husi tetu no tais hamutuk hanoin-matenek oin-oin, mak timoroan sira hamosu Planu Rekuperasaun Ekonómika ne’ebé Governu sei implementa ho medidas ba prazu badak, médiu no naruk.

Planu Rekuperasaun Ekonómika ne’ebé VIII Governu hato’o dadaun ne’e, sei hatán ba problema sira ne’ebé Timor-Leste hasoru tiha ona horiuluk kedas, ikusmai agrava liután ho Covid-19.

Ho Planu Rekuperasaun Ekonómika, Governu Timor-Leste hatudu dadaun katak ninia polítika públika haree liuliu ba ema.

Nune’e, ha’u fiar katak Planu Rekuperasaun Ekonómika ida ne’e sei permite hasa’e produsaun no produtividade ai-han, no sei kontribui ba hamenus hamlaha babeibeik. Katak bainhira ita hasa’e produsaun ho di’ak, ita ida-idak sei han loron-loron ho kualidade di’ak.

Atu Planu ne’e iha susesu, ita hotu tenke fó liman ba malu, la haree ba rasa, feto ka mane, otas, relijiaun ka kór polítika.

Timor-Leste konta nafatin ho Nasoins Unidas nia kontribuisaun no ho mós parseiru dezenvolvimentu ida-idak, atu dezenvolvimentu la’o ba oin ho populasaun saudável no matenek, iha aspetu hotuhotu. (*/cao)

 845 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Prezidente Repúblika fó Parabens ba FAO iha Sel…” A few seconds ago

Lee Mós :
Indonézia Livre husi Zona Mean COVID-19

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No