DILI—Ministru Negósiu Estranjeiru no Kooperasaun (MNEK), Dionisio Babo Soares simu ona informasaun husi Embaixadór Timor Leste ba United Kingdom (UK), Gil da Costa kona-ba timoroan ida mate iha rai ne’eba, maibé nia husu atu Embaixadór buka tan informasaun klean hodi hatene mate tanba COVID-19 ka lae.
“Sim. Lós duni! mate dehan tanba COVID-19, maibé ha’u husu Embaixador atu buka tan informasaun hosi família hodi ita hatene sé ne’e COVID-19 ka la’ós,” Ministru Dionisio ba Timor Post via telefone, Kinta (07/05/2020).
Ministru dehan, nia rasik seidauk hetan dokumentu ruma husi médiku iha Irlanda ne’ebé konprova katak timoroan ne’e mate tanba COVID-19.
Informasaun ne’ebé Timor Post hetan, haktuir, timoroan ne’ebé mate ho naran, Luciana Viviana da Silva, koñese liu ho naran Anoy Soriano, moris iha DIli, 17 Dezembru 1961, mate ho idade 58, klosan.
Matebian durante ne’e servisu iha Moypark, hela iha 70 Woodburn Crescent, Dungannon.
Matebian hakotu iis iha loron 3/5/2020 kalan besik 11. No deskonfia hetan moras pneumonia ho COVID-19. (cao)
1,068 total views, 3 views today
Bele hare Video Seluk :