DILI—Uniaun Europeia (UE) no Nasoens Unidas (NU) iha nafatin komitmentu hodi proteze no apoiu feto no labarik feto sira iha Timor-Leste no deside ona finansiamentu Milliaun USD 1 husi orsamentu rekursu Spotlight Initiative hodi responde ba aumentu risku violénsia kontra feto no labarik feto hotu iha Timor-Leste iha kontestu pandemika COVID-19.
Komunikadu ba imprensa ne’ebé Timor Post asesu iha loron 14/04/2020, haktuir, liu husi Sportlight Initiative, ekipa nasionál UE-ONU halo diskusaun ho paseiru sira ne’ebé modifika sira nia programa hodi responde ba kontestu atual, inklui apoiu ba polítika, haforsa tan apoiu ba organizasaun sosiedade sivíl, aumenta involvimentu ho setór edukasaun no saúde, no sensibiliza konsiensia kona ba aumento ba risku violénsia kontra feto no labarik feto sira.
“Coronavirus iha impaktu bo’ot ba ema hotu nia saúde, bem estar ekonomia sosial no sira nia direitu rasik. Liu husi Sportlight Initiative ami nia parseiru sira muda sira nia programa ba kontestu COVID-19: muda servisu no kampaña online, aumenta tan apoiu ba organizasaun sosiedade sivíl hodi bele responde iha liña oin, garante katak servisu hotu laos em geral de’it maibe tenki fasilita liu ba grupu sira ne’ebé dala barak liu husik hela iha kotuk ka marginalizadu. Iha krizi global sem presedente no impressivel ida ne’e, Uniaun Europeia kontinua kompromete hodi proteze no apoia feto sira iha Timor-Leste”, afirma Andrew Jacobs, Embaixador Uniaun Europeia iha Timor-Leste.
Rekoñese katak esforsu signifikativu ne’e nesesariu tebes hodi foti medida prevensaun no responde hasoru COVID-19, Sportlight Initiative, halo konsultasaun ho parseiru sira, no tau ona prioridade no esforsu ne’ebé adekuadu hodi hatan ba Violénsia Kontra Feto no Labarik Feto sira iha kontestu COVID-19. Husi total orsamentu Inisiativa ba tinan 2020/21 hamutuk USD 9.9 milliaun ne’e, sei aloka USD 1 milliaun hodi dedika ba:
- Prestasaun asistente tekniku kritiku ba dezenvolvimentu polítika no programa sira (inklui relasaun ho instalasaun fasilidade karantina) no kordenasaun ba Violénsia Kontra Feto no Labarik Feto hotu iha kontestu COVID-19;
- Komunikasaun risku hodi sensibiliza aumentu husi risku Violénsia Kontra Feto no Labarik Feto Sira iha kontestu COVID-19 no oinsa komunidade sira bele iha asaun hodi prevene violénsia;
- Apoiu organizasaun sosiedade sivíl hodi garante katak feto no labarik feto sira bele kontaktu ba prestador servisu sira (hanesan polisia, saúde ou servisu ajudus sosial) no garante katak sei atende nafatin ema sira ne’ebé vulneravel liu (ezemplu ba ema difisiente sira); no,
- Ajusta involvimentu ho eskola no inan aman sira hodi promove sa’ude no relasaun respeito malu iha kontestu foun, iha aprendizagem distansia do’ok no reforsa apoiu ba feto no organizasaun lokal sira hodi kontinua sira nia servisu ne’ebé importante ba sira hodi promove feto sira nia direitu kontinua proteze saúde no seguransa ba sira nia funsionariu no parseiru komunidade sira.
Hanesan pandemia COVID-19 ne’ebé espalla mundo tomak, Sportlight Initiative toma nota iha ninia relatorio liu-liu kona ba, aumentu husi violénsia domestika no violénsia parseiru intimu. Iha faktores oioin ne’ebé lori violénsia kontra feto no labarik feto sira, partikularmente feto no labarik feto sira ne’ebé mak infrenta ona dezafiu iha sira nia komunidade rasik, ezemplu mak tamba sira ema difisiente no moras. Feto no Labarik Feto sira infrenta risku violénsia bo’ot, tamba aumenta izolasaun iha sira nia uma, distansia movimentu iha liur, interupsaun iha meius substansia, eskola sira taka hela no tensaun ne’ebé mak aumenta iha familia laran no uma kain sira sai hanesan efeksaun ida. Risku hirak ne’e mos aas iha Timor-Leste: durante periodu blokeadu, feto sira iha risku violénsia ne’ebé mak bo’ot iha uma, liu fali tempu uluk, tamba limita hela sira nian movimento ne’ebé sei fo presaun aas tebes ba sira.
“Abordagem ba violénsia bazeia ba generu mak sai sentru ba ami nia programa hodi resposde ba COVID-19. Ita hotu iha responsabilidade ba asaun ida ne’e, husi individu ida ba governu, husi ONU ba parseiru sira hotu, no husi emprezariu sira ba iha sosiedade sivíl hotu. Ami nia apoiu vital ba Timor-Leste liu husi Governu no sosiedade sivíl, sei kontinua hodi komesa, kontra violénsia hasoru feto no labarik feto sira, inklui desafios foun ne’ebé hamosu husi COVID-19. Ida ne’e hanesan momentu ida ba Timor-Leste atu foti asaun solidariedade no transforma krize ida ne’e ba momentu ida hodi alkansa mehi global. Nasoens Unidas sei kontinua garante katak ema sira ne’ebé ami servi, sei sai forte liu husi krize ne’e no direitu fundamental ba feto, joven feto, no vulneravel sira sei hetan protesaun”, afirma Roy Trivedy, Kordenador Residente Nasoens Unidas iha Timor-Leste. (cao)
892 total views, 3 views today
Bele hare Video Seluk :
Subscribe to Timorpost
