DILI (timorpost.com) — Prezidente Repúblika (PR), José Ramos Horta, Tersa (06/12), ho delegasaun dezloka ona ba Singapura, atu vizita hahú husi loron 7 to’o 10 no sei fila iha loron 11 fulan Dezembru tinan 2022.
Singapura no Timor-Leste hakesi relasaun diplomátika hahú kedas iha fulan maiu tinan 2002 no Embaixada Timor-Leste nian iha Singapura inaugura kedas iha fulan Dezembru tinan 2010.
“Durante vizita Xefe Estadu Ramos Horta, sei hala’o enkontru ho nia omólogu Prezidente Repúblika Singapura, Halimah Yacob no Primeiru-Ministru Singapura, Lee Hsien Loong,” prefere nota Imprensa ne’ebé Online Timor Post asesu iha Tersa ne’e.
Primeiru-Ministru sei oferese almosu ofisiál ida ba Prezidente Repúblika no delegasaun, tuir mai banquete/han kalan, Estadu ida sei oferese husi Prezidente Repúblika Singapura ba ninia omólogo Prezidente Timor-Leste, José Ramos Horta.
Prezidente Repúblika, sei hala’o mós Palestra Públika ida iha Institutu Yusof Ishak, ne’ebé sei modera husi Ministru Relasoens Exteriores Singapura, Vivian Balakrishnan.
Iha biban hanesan, Prezidente Repúblika Timor-Leste mós sei partisipa iha Fórum Empresarial, ne’ebé organiza husi Governu Timor-Leste ho apoiu no partisipasaun husi setór privadu sira husi nasaun rua nian.
Ikus liu, Prezidente Repúblika, sei halo la’o ain turístiku ida, hodi haleu Reservatóriu ba Reaproveitamentu bee.
Singapura no Timor-Leste hametin parseria forte tebes ne’ebé hatur iha valór no objetivu komun sira. Rai rua ne’e mós asina kooperasaun bileteral kona-ba akórdu serbisu aréu no Singapura fó ona asistensia téknika ba Timor-Leste, liuhusi formasaun ba funsionáriu públiku sira, liu atus hitu (700).
Formasaun hirak ne’ebé ajuda hodi fó kontribuísaun ba dezenvolvimentu rekursus umanus iha Timor-Leste. Alende investidór sira husi Singapura barak mós maka investe iha Timor-Leste.
Vizita ida ne’e nu’udar vizita Estadu ba dalima hafoin simu investidura nu’udar Prezidente Repúblika Demokrátika Timor-Leste daruak.
Atu fó hanoin mós katak, molok vizita Estadu ba Singapura, Prezidente Repúblika mós hala’o ona vizita ba Estadu Indonésia, Austrália, Portugal no Reinu husi Kamboja.
1,402 total views, 3 views today
Bele hare Video Seluk :