DILI (timorpost.com) – Ministra Negósiu Estranjeiru no Kooperasaun (MNEK), Adaljiza Magno, hatete nasaun Kambodia mak apoiu maka’as liu Timor-Leste atu tama ba iha ASEAN (Association of Southeast Asian Nations).
“Kambodia ha’u bele dehan um dos grandes suporta, sira ne’e mak halo advokasia maka’as loos ba ita-nia prosesu atu tama ba iha ASEAN ne’e,” nia hateten iha Palásiu Governu, Tersa (25/10).
Nia dehan, Kambodia mós tulun emprezáriu sira barak, ajuda Tradi Invest hodi organiza bisnis forum boot ida kuandu ba vizita iha ne’ebá.
“Tanba ne’e mak ohin ha’u hasoru Primeiru Ministru, atualiza vizita Xefe Estadu nian ba iha Kambodia iha semana kotuk, no segundu mak ko’alia mós kona-ba preparasaun Xefe Estadu nian atu ba vizita tan iha Portugál,” dehan nia.
Adaljiza dehan, tanba ne’e ohin informa rezultadu enkontru Xefe Estadu nian ba iha Kambodia no saida mak presiza atu halo ba oin.
“Ba Kambodia ne’e novidades di’ak mak agora ita hein hela sira ASEAN atu dehan bainhira mak ita atu tama, tanba bele akontese iha tempu besik, ita la hatene iha tempu naruk,” nia konfesa.
Adaljiza afirma tan, ne’ebé agora Timor-Leste hein de’it rezultadu iha semana ida ka rua ne’e nia laran, hodi rezultadu sira fó sai, maibé país membru barak apoiu tebes atu sai membru, liuliu Kambodia.
1,650 total views, 3 views today
Bele hare Video Seluk :