DILI (timorpost.com) – Governu Timor-Leste sei servisu hamutuk ho Governu Portugál hodi bele lori fila hotu sidadaun Timoroan sira ne’ebé ba terus iha ne’ebá inklui seidauk hetan servisu iha Portugál.
“Sim, timoroan iha Portugál agora 5000 mill, maibé sira enfrenta problema ne’e hamutuk 700 to’o 800 de’it, problema tanba la hetan servisu no laiha hela fatin,” dehan Ministra Negósiu Estranjeiru no Kooperasaun, Adaljiza Magno, iha Palásiu Governu, Tersa (25/10).
Nia dehan, iha semana kotuk Konsellu Ministrus aprova ona medida emerjénsia hodi bele ajuda timoroan sira ne’ebé sei enfrenta problema iha Portugál.
“Depois parte Portugál mós tenta kolabora ho ita atu bele oinsá hamenus timoroan sira ne’ebé atu ba, ne’ebé ita buka dalan hela oinsá atu halo ida ne’e,” deklara nia.
Entaun kuandu sira voluntáriu atu fila tanba susar atu hetan servisu Governu Timor-Leste sei ajuda sira hodi lori fila sira mai Timor-Leste.
“Kuandu atu deporta entaun sira ida kaer atu deporta sira fila ne’e mak sei responsabiliza atu bele lori fali sira mai iha Timor-Leste,” deklara Ministra.
Tanba ne’e Governu Timor-Leste konkorda ona atu halo Kolaborasaun ho parte Portugál hodi bele tau matan ka hamenus ema sira ne’ebé ba Portugál laiha garantia ba servisu.
“Depois mós sei suporta ho medidas sira balun hodi bele halo sira hetan servisu no moris di’ak liután, maibé ba susar atu hetan servisu Governu prontu atu bele lori fila sira,” Adaljiza subliña.
Atu hakotu nia dehan, ho ida Xefe Estadu José Ramos Horta, sei hamutuk ho membru Governu balun iha tempu badak sei ba Portugál hodi ko’alia asuntu sira ne’e, nune’e mós bele buka dalan oinsá timoroan sira iha ne’ebá bele hetan servisu.
2,690 total views, 3 views today
Bele hare Video Seluk :