DILI (timorpost.com) — Prezidente Repúblika José Ramos Horta no delegasaun to’o iha Nova Iorke iha loron (22/09), hodi partisipa iha Asembleia Jerál ONU ba dala-77.
Tuir komunikadu ne’ebé Timor Post Online asesu iha ekipa delegasaun ho Xefe Estadu to’o iha Amérika, husi ne’e Prezidente Horta hasoru malu ho Primeiru Ministru (PM) Portugal António Costa, hodi ko’alia kona-ba adezaun Timor-Leste ba ASEAN.
“Husi hasoru malu ida ne’e ita fó oportunidade boot ba empreza Portuguesa sira, iha area farmaséutika, ekipamentu médiku, indústria kalén, sapatu no seluk tan, inklui kriasaun armazena iha Timor-Leste, hodi atende Merkadu Internasionál ho abitante millaun 700 ne’ebé iha kapasidade kompra aas”, hateten Horta.
Enkuantu, iha parte loro-kraik, Prezidente simu Konselleiru Departamentu Estadu Unidus Amérika, Derek Chollet no altu funsionáriu sira seluk husi Departamentu Estadu.
Enkontru ne’e foka liu ba preokupasaun global kona-ba situasaun trájika no inadmisivel ne’ebé hetok a’at liu tan iha Myanmar. Komunidade Internasionál, inklui jornalista sira sente distraida ho funu iha Ukránia no populasaun ne’ebé abandonada iha Myanmar.
Prezidente Horta no Lider Karizmátiku Xanana Gusmão, daudaun iha Nova Iorke. Ohin sira hasoru malu hodi ko’alia kona-ba situasaun global, inkapasidade Sistema multilaterál hodi atende dezafiu sira no ninia impaktu ba estadu frajil no nasaun seluk.
Alende ne’e mós aban dadeer (23/09) Prezidente Repúblika, José Ramos Horta, sei halo diskursu iha Asembleia Jerál ONU.
2,074 total views, 12 views today
Bele hare Video Seluk :
Subscribe to Timorpost
