DILI (timorpost.com) — Primeiru Ministru husi Kambodia, Hun Sen, hato’o mensajen ba Primeiru Ministru (PM), Taur Matan Ruak, katak sira apoiu totalmente Timor-Leste atu sai membru ba ASEAN.
“Ohin ha’u informa ba Primeiru Ministru katak, ha’u hasoru Primeiru Ministru Kambodia ninian hodi enkontru no hateten, Governu no povu Kambodia halo esforsu hodi suporta Timor-Leste atu tama iha ASEAN,” dehan Ministru Turizmu Komérsiu no Indústria (MTKI), Jose Lucas do Carmo da Silva, iha Faról, Tersa (20/09).
Nia subliña, durante nia enkontru ho Primeiru Ministru Kambodia, Hun Sen, katak sira re-afirma apoiu totalmente Timor-Leste atu sai membru ba ASEAN iha tinan 2022 ne’e nia laran.
“Mensajen ida ne’e mak Primeiru Ministru Kambodia, hato’o mai ha’u, hodi ohin ha’u mai informa fali ba Primeiru Ministru, Taur Matan Ruak,” deklara nia.
Tanba ne’e mak ohin nia ma’i atualiza ba Xefe Governu, kona-ba nia vizita ba Kambodia iha semana hirak liubá, tanba hetan konvite hodi ba enkontru ho Ministru Ekonomia Asean ninian, maski seidauk sai membru maibé Timor-Leste hetan konvite.
“Konvite ida ne’e Primeira-vés Timor-Leste hetan, tanba ne’e mak nia ba partisipa, no iha ne’ebá mak hetan oportunidade hodi enkontru mós ho Primeiru Ministru Kambodia, Hun Sen,” nia hakotu.
1,850 total views, 3 views today
Bele hare Video Seluk :
Subscribe to Timorpost
