DILI (timorpost.com) — Prezidente Repúblika, José Ramos Horta, hatete Timor-Leste nia kooperasaun bilaterál ho Malázia di’ak tebes, tanba dezde uluk kedas Malázia apoiu Timor-Leste atu adere ba Association of South East Asian Nations (ASEAN).
“Ita-nia kooperasaun ho Malázia di’ak tebes, nasaun ho komunidade di’ak loos no dezde uluk kedas Malázia apoiu ita atu tama ASEAN, tantu Malázia relasaun di’ak, ha’u sei buka aumenta liután relasaun ho sira,” Xefe Estadu hateten bainhira partisipa iha selebrasaun loron Independénsia Malázia nian ba dala 65 iha Hotel Novo Turizmu, Kinta (15/09).
Nia dehan, Malázia hanesan rai ida apoiu Timor-Leste maka’as hahú kedas iha tinan 2000 ho forsa da pás Malázia nian no iha krize 2006 sira haruka sira nia forsa mai.
PR Horta haktuir, Primeiru Ministru Mahatir, Primeiru Ministru ASEAN nian mai vizita Timor no fó apoiu maka’as, hanesan uluk sira oferese kilat mai iha forsa armada primeira-vés ne’e ba Timor, nein iha osan atu sosa.
Xefe Estadu esplika, planu ona sei halo vizita ba Malázia oinsá buka aumenta relasaun bilaterál Timor-Leste ho Malázia, seida’uk ba, tanba agora sira iha inserteza polítika tanba eleisaun atu mai no lahatene loos bainhira, tanba sira nia sistema Parlamentu ho Primeiru Ministru mak deside eleisaun, maibé besik ona, entaun ko’alia ho sira liu tiha mak ba vizita Malázia.
Alende ne’e mós PR Horta kongratula loron independensia Malázia nian, no sente kontente mai hamutuk ho Embaixada Malázia, hodi komemora loron indenpedénsia ne’e.
“Ha’u partisipa iha embaixada ba rai hotu-hotu, eventu ruma ita hatudu respeitu amizade ba sira rai ki’ik ka boot no riku ka la riku, ne’e tenke respeita,” nia dehan.
Iha fatin hanesan, Charge Affaires Embaixada Malázia iha Timor-Leste, Nadia Azura Mohd Nudri, hatete embaixada hamutuk ho sidadaun ka família Malázia iha Timor-Leste besik 100 sente kontente, hodi komemora loron independénsia Malázia ba dala 65 ne’e iha Timor-Leste.
Nia haktuir, relasaun bilaterál ho Timor-Leste durante ne’e servisu hamutuk pozitivu tebes iha aspeitu oioin inklui apoiu adezaun Timor Leste ba ASEAN, nune’e ba oin sei aumenta liután kooperasaun entre nasaun rua iha área dezenvolvimentu.
2,772 total views, 3 views today
Bele hare Video Seluk :