DILI (timorpost.com) — Prezidente Repúblika (PR), José Ramos Horta, hatete polítika esterna entre Timor-Leste, Austrália no Indonézia ne’e importante tebes, dezde Governu no Prezidénsia dahuluk.
Nia hatete, hanesan hotu-hotu hatene ona polítika nasionál esterna Timor-Leste, importante no prioridade mak Indonézia ho Austrália.
“Dezde tinan 2002, ha’u hanesan Ministru Negósiu Estranjeiru, Marí Alkatiri hanesan Primeiru Ministru, Maun Boot Xanana hanesan Prezidente Repúblika, ha’u rasik mak momentu ne’ebá rekomenda, kuandu Primeiru Ministru ho Prezidente eleitu, nasaun dahuluk ne’ebé ita vizita mak Indonézia no Austrália,” Sita Komunikadu husi SKS iha Cambera, ne’ebé Timor Post Online asesu, Sesta (09/09).
Nia dehan, durante iha Austrália, Prezidente Repúblika hala’o enkontru ho entidade oi-oin, atu hametin relasaun entre nasaun rua.
“Horisehik enkontru ona Primeiru Ministru, Ministru Negósiu Estranjeiru, Ministru Defeza ho deputadu lubuk ida, haree ajenda ida klaru kona-ba Greater Sunrise, kooperasaun ekonómika ne’ebé tulun timoroan sira, hanesan bolsa estudu no traballadór ne’ebé mai iha Austrália hodi apoia diversifikasaun ekonómika,” Xefe Estadu subliña.
Xefe Estadu mós rekoñese papél Governu Australianu nian dezde tinan 1999, hodi apoia dezenvolvimentu nasionál no fó oportunidade servisu ba timoroan sira.
2,089 total views, 6 views today
Bele hare Video Seluk :