DILI (Timor Post) – Ministra Negósiu Estranjeiru no Kooperasaun (MNEK), Adaljiza Magno, informa ba Primeiru Ministru (PM), Taur Matan Ruak, atu prepara rekursu molok ema deklara Timor-Leste sai membru ASEAN (Association of Southeast Asian Nations).
“Ha’u ho ekipa ASEAN no ekipa asesoria tékniku ADB, esplika ba Primeiru Ministru, kona-ba preparasaun tékniku saida mak ita tenke halo hodi bele prepara an di’ak liután kuandu Fim do Anu ne’e ASEAN anúnsiu ona katak ita tama ona membru”, nia hateten iha Faról, Kuarta (31/08).
Nia dehan, adezaun formál Timor-Leste nian ba ASEAN ne’e sei akontese iha tinan oin 2023.
Nia reforsa, entaun nia parte ohin mai esplika saida mak MNEK halo ona no lidera, no mós sei afeta ba servisu liña ministerial seluk.
“Ita tenke prepara tan Rekruta Umanu balun, ita mós tenke aprova tan lejizlasaun sira balun hodi nune’e ita prepara an di’ak liután,” nia deklara.
Ministra ne’e subliña, tanba esforsu ida ne’e hatudu ba País Membru sira katak, Timor-Leste halo ona esforsu hafoin sira anunsia hodi hatudu Timor-Leste bele tama ona sai membru ASEAN iha tinan oin.
Tanba sira hakarak anúnsiu Timor-Leste sai membru ASEAN iha fulan Novembru ida ne’e, no karik buat hitu la’o ho di’ak Timor-Leste sai ona membru iha tinan oin.
“Sim, Governu prenxe hotu ona rekizitu, tanba ne’e mak membru komisaun akollamentu verdade husi ASEAN ne’e foti, rezultadu pozitivu, iha de’it buat balun ne’ebé sira husu ita atu ajusta tan, maibé ita hein,” Adaljiza konfesa.
Ikus nia repete, Timor-Leste agora presiza rekursu umanu tan hodi tau iha liña ministerial sira, iha area oi-oin, hanesan agrikultura, telekomunikasaun, aviasaun no seluk tan.
1,656 total views, 3 views today
Bele hare Video Seluk :