Indonézia (Timor Post) – Prezidente Parlamentu Nasionál (PN), Aniceto Guterres, ba vizita rate Ade Rostina Sitompul, iha Indonézia, nu’udar ativista másimu ba direitu umanitária ne’ebé apoiu makas ba Timor-Leste nia indepedénsia.
Iha vizita ne’e, Prezidente Parlamentu Nasionál, akompaña hosi Deputadu Grupu Amizade Parlamentar Timor-Leste ba Dewan Perwakilan Rakyat Republik Indonesia (DPR-RI).
Tuir Prezidente Parlamentu, via telefónia Kuarta (24/08), katak vizita ida ne’e ho objetivu atu mai kare ai-funan iha rate Ibu Ade Rostina Sitompul, tanba nu’udar feto Forte ida, nu’udar ativista umanitaria ne’ebé apoiu makas Timor-Leste nia independénsia ba direitu demokrasia.
Hafoin kare ai-funan ba rate Ibu Ade Rostina Sitompul, delegasaun Prezidente Parlamentu Nasionál mós hasoru malu grupu solidaridade ne’ebé iha tempu rezisténsia apoiu makas Timor-Leste nia Independénsia iha prosesu luta libertasaun nasionàl no luta ba demokrasia iha Indonézia rasik.
Prezidente PN dehan, grupu solidaridade ne’e, kompostu hosi Estudante Timoroan ho Indonézia ne’ebé eziste ho objetivu luta ba Independénsia Timor-Leste no demokrasia ba Indonézia.
Ho apoiu hirak ne’e mak daudaun ne’e Timor-Leste hetan ona nia Independénsia, demokrasia la’o di’ak tebes maibé la akompaña ho dezenvolvimentu ne’ebé di’ak, tanba ne’e palavra aluta kontinua tenke hakilar nafatin maibé luta ho demisaun foun mak lori dezenvolvimentu no prosperiadade ba Povu.
Iha parte seluk, nu’udar reprezentante grupu solidaridade Indonézia ba Timor-Leste, Joshon Panjaitan, hatete soru-mutu ne’e importante tebes hodi hametin nafatin lasu amizade entre grupu solidaridade no ativista direitu umanus no demokrasia.
Nia hatete, labele haluhan no tenke iha prinsípiu ida katak liberdade no demokrasia, uluk defende Timor-Leste, ohin sai indepedénsia ba dala-20.
“Ita labele lori razaun dezenvolvimentu hodi haluha prinsípiu ne’ebé uluk ita defende, satán haluha ami besik liu ba sira ne’ebe la ideia ho ita,” nia sublina.
Ativista sira ne’ebé hasoru malu ho delegasaun Prezidente Parlamentu Nasionál, mak Eis Romo Sandewa, Joshon Panjaitan, Dedi Syech, Wilson, Rico Aditjondro, Hilman Farid no sira seluk.
1,467 total views, 3 views today
Bele hare Video Seluk :