DILI (Timor Post) – Governu Timor-Leste liuhusi Ministériu Negósiu Estranjeiru no Kooperasaun (MNEK), hamutuk ho Embaixadór Japaun, realiza asina akordu ba programa reabilitasaun urjente infraestrutura ne’ebé hetan estragu husi inundasaun ho bolsa estudu dezenvolvimentu rekursu umanu Japan Development Scholarship (JDS).
Embaixadór Japaun ba Timor-Leste, Masami Kinefuchi, hatete serimónia ohin asina troka notas ba projetu rua, maka programa ba reabilitasaun urjente infraestrutura ne’ebé hetan estragu husi inundasaun ho bolsa estudu dezenvolvimentu rekursu umanu ka JDS.
“Programa ne’ebé ohin loron ita asina ne’e hanaran JDS, programa ne’e komesa iha tinan haat (4) liubá, hodi konvida futuru lideransa sira, liuliu funsionáriu públiku sira iha Timor-Leste, hodi hala’o estudu iha Japaun hodi hetan koñesimentu espesializada no abilidade ba polítika planeamentu no implementasaun hodi bele hala’o papél importante ba Dezenvolvimentu Timor-Leste nian bainhira sira fila hikas mai”, nia hatete iha salaun Nobre MNEK Pantai-Kelapa, Tersa (16/08).
Nia esplika, sira-nia programa bolsa estudu ho Timor-Leste ba funsionáriu sira kontinua mestradu iha ne’ebá, maibé la’ós funsionáriu sira de’it, tanba ne’e sira mós fó bolsa ba estudante husi Universidade Nasionál Timor Lorosa’e (UNTL) Fakuldade Enjeñaria nian, no funsionáriu sira konforme husi kursu ne’ebé sira ida-idak foti.
Tanba ne’e, nia informa, orsamentu ne’ebé Embaixada Japaun apoiu ho montante 9.25 USD, ba programa reabilitasaun urjente infraestrutura ne’ebé hetan estragu husi inundasaun mak hanesan reabilitasaun moru protesaun mota Komoro, estasaun tratamentu bee moos no fasilidade sira iha Buluto munisípiu Manatutu no Baukau nian.
“Ami-nia kontribuisaun ba dezenvolvimentu Timor-Leste nian boot tebes, buat barak mak konsege atinje ona iha setór infraestrutura nian, nune’e mós iha setór sira seluk, liuhusi ami-nia ezisténsia”, nia hateten.
Nia dehan, Timor-Leste mós iha esperiénsia ona dezastre naturais boot sira hanesan inundasaun ho rai halai, no iha illa ne’e mós esperiénsia ona iha foin lalais ne’e, iha loron 4 Fulan Abríl tinan kotuk, inundasaun istóriku ida harahun ema barak nia moris no estraga infraestrutura importante barak iha país laran tomak.
“Ha’u espera servisu urjente nesesáriu hirak ne’e bele kompleta tuir planu, agora ami finaliza daudaun asisténsia seluk hodi fornese ekipamentu oioin ne’ebé autoridade Timorense sira sei utiliza ba rekuperasaun no redusaun risku husi dezastre ne’ebé sei to’o mai iha tempu badak,” nia afirma.
Iha fatin hanesan, Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, reforsa tan Bolsa Estudu ida ne’e la’ós ba funsionáriu iha kapitál Dili de’it, maibé ba funsionáriu hot-hotu iha Timor Laran tomak no funsionáriu ne’ebé hatene Lian inglés.
“Tanba tuir kritériu ne’ebé iha Governu atu estabelese prosesu tuir ezame se sira pasa bele ba hala’o estudu, se sira la pasa bele aprende tan,” nia hakotu.
2,128 total views, 3 views today
Bele hare Video Seluk :