Dili (Timor Post) – Governu Timor-Leste liuhusi Ministériu Justisa (MJ), hamutuk ho Estadus Unidas Amérika (EUA), Selebra asina ona akordu arrendamentu ba tempu naruk no propriedade diplomátiku sira nasaun rua ne’e nian iha Timor-Leste no iha Estadus Unidus Amérika hodi hametin engajamentu diplomátiku.
Reprezentante Enkaregadu Negósiu Embaixada Amérika, Tom Daley, afirma liuhusi arrendamentu hirak ne’e, Governu rai-rua konkorda ona hodi arrenda propriedade diplomátiku sira ne’ebé sei permite nasaun rua ne’e atu hametin liután engajamentu diplomátiku. Akordu ne’e fó dalan ba Governu Estadus Unidus Amérika, hodi halo arrendamentu ba ninia Embaixada nia propriedade imóvel ne’ebé eziste iha Dili.
Nia dehan, Governu Timor-Leste bele halo arrendamentu ba nia Embaixada nia fatin foun ida iha Washington no fatin foun ida ba Timor-Leste nia Misaun ONU iha Nova Yorke. Termu arrendamentu hirak ne’e ninia durasaun to’o tinan 50 no automatikamente sei renova no hanaruk tan ba tinan 50.
“Asina kontratu arrendamentu ohin loron nian hanesan garantia ida importante tebes kona-ba ami-nia kompromisu ba tempu naruk ho Timor-Leste. Iha asina akordu ne’e signifika ita bele promove ho di’ak liután pilár fundamentál hirak ne’ebé define relasaun bilaterál entre rai-rua, hanesan belun, parseria, no oportunidade sira”, nia hateten hafoin remata asina Akordu iha Salaun Nobre MNEK, Pantai Kelapa, Sesta (12/08).
Nia hatutan, Asinatura ohin loron nian sei permite hodi dezenvolve bazeia ba parseria demokrátika iha dékada hirak tuirmai hodi promove liután povu Timor-Leste no Amerikanu sira nia interese.
Embaixada Estadus Unidus Amérika iha Dili, hari’i iha tinan 20 liubá nu’udar estrutura temporáriu ne’ebé la adekuadu atu apoia parseria ne’ebé aumenta entre Estadus Unidus no Timor-Leste.
Governu Estadus Unidus iha planu atu hari’i edifísiu Embaixada ida ne’ebé foun, modernu atu nune’e akomoda pesoál sira diplomátiku, defeza no dezenvolvimentu nian hodi serbisu ba hametin Estadus Unidus Amérika no Timor-Leste nia parseria.
“Ha’u la koñese loloos kona-ba medida rai, maibé hakarak hatete ba ita hotu, katak valor rai ne’ebe iha Wasintong atu hanesan ho ida iha Timor-Leste, nune’e ami asina akordu ne’e durasaun ba 50 anos, depois bele prolonga tan 50 anos, bele to’o 100 anos, nune’e aplika hanesan ba pais rua (2) mak wasintong no Nova-Yorke”, nia hateten.
Alende ne’e Vise Ministru Justisa, Tiago Sarmento, dehan ohin loron sira konsege marka istória ida, tanba ne’e Pela primeira-vés sira aplika prosperidade ho pais boot Amérika.
Nia dehan, prinsípiu ida ne’e foin aplika, no Estadu Timor-Leste sei halo mós negosiasaun ho Embaixadór sira seluk para depois aplika prinsípiu prosperidade no prinsípiu ne’ebé iha parte rua sei lá selu malu.
“Ita hakas an hela depois ko’alia ho Embaixadór sira seluk, tanba ne’e ohin Estadus Unidus Amérika, hahú ona, ne’ebé ba Embaixada hotu-hotu iha Timor laran ita sei halo hanesan ne’e”, nia hakotu .
994 total views, 3 views today
Bele hare Video Seluk :
Subscribe to Timorpost
