DILI (Timor Post)- Diretór Ajénsia Citilink Timor-Leste, Fernando da Silva, rekoñese horisehik Segunda (25/07), aviaun la halo viajen ba Indonézia tanba parafuzu parte liras nia hamutuk 14 mak monu sai tiha.
“Horisehik Aviaun Citilink nia mai husi Denpasar Indonézia tula pasajeiru hamutuk 177, no nia to’o buat hotu-hotu la’o ho di’ak, maibé tékniku sira ba check fali iha aviaun nia liras ne’e parafuzu balun mak laiha, entaun tuir prosedura pilotu labele semo fila fali ba Denpasar,” nia hateten iha Aeroportu Internasionál Nicolau Lobato, Tersa (26/07).
Nia reforsa, tanba ne’e horisehik kontinua hein maibé desizaun husi kantór pusat la tun, entaun pilotu ho parte kruu ne’e ninia oras servisu hotu ona, entaun sira tenke fila ba deskansa.
“Maibé iha tempu lokraik husi kantór pusat Jakarta hatún ona autorizasaun, entaun servisu ho parte sivilizasaun Timor-Leste no ANA-TL, no ohin dadeer semo fila fali ona, no aviaun kondisaun di’ak hela,” deklara nia.
Nia subliña, ohin arranka ba ne’e tula pasajeiru hamutuk 120 resin, tuir loloos 135, maibé balun kansela tiha.
“Pasajeiru sira ne’ebé ohin tula ne’e balun ba iha Jakarta no balun timoroan sira ne’ebé atu ba Europa,” nia hateten.
Nia reforsa tan, informasaun kona-ba parafuzu hamutuk 14 ne’e loos, maibé kada aviaun ida mai ne’e tékniku ida sempre tuir entaun horisehik tékniku aviaun Citilink ninian rezolve tiha ona situasaun ida ne’e.
“Ohin aviaun semo ona ne’e signifika tékniku sira rezolve situasaun sira ne’e hotu ona, no parte pilotu nia dehan aviaun kondisaun di’ak ne’e mak semo ona ne’e,” hakotu.
334 total views, 3 views today
