Jakarta (Timor Post)- Prezidente Repúblika, José Manuel Ramos Horta, Iha loron Kuarta (20/07) lokraik, hasoru malu no Sekretáriu Jerál Association of Southeast Asian Nations (ASEAN), iha Jakarta, Lim Jock Hoi, hodi ko’alia kona-ba preparasaun Timor-Leste nian atu adere ba ASEAN.
Iha enkotru ne’e hetan akompañamentu husi Ministra Negósiu Estranjeiru no Kooperasaun, Adaljiza Magno.
Durante reuniaun parte rua ko’alia kona-ba Timor-Leste nia prosesu adezaun ba ASEAN partikularmente Fact Finding Mission ba Pillár prinsipál tolu hanesan Komunidade Polítika-Seguransa ASEAN, Komunidade Ekonómika ASEAN no Komunidade Sósiu-Kulturál ASEAN.
Sekretariadu ASEAN hato’o mós katak daudaun ne’e delegasaun ASEAN nian kompostu husi ofisiál Estadu membru sira husi Socio Cultural Community (SOCA) órgaun setoriál ASCC, Misaun Permanente Estadu Membru sira ba ASEAN, no Sekretariadu ASEAN hala’o hela avaliasaun ba pillár Komunidade Sósiu Kulturál no kontinua ho pillár Komunidade Ekonómika ASEAN. Adisiona tan katak Tanba COVID-19, ASEAN hala’o ona FFM virtuál ida hamutuk ho pillár rua seluk.
Ho misaun ne’e remata, sei prepara relatóriu avaliasaun ASCC nian ba konsiderasaun husi SOCA no submisaun tuir mai ba Konsellu Koordenadór ASEAN. Husi parte sekretáriadu ASEAN hein katak relatóriu husi Fact Finding Mission ne’e sei lori impaktu pozitivu no fó sai roadmap atu aselera Timor-Leste sai parte husi país membru ASEAN.
Aleinde ne’e, husu mós atu durante prosesu adezaun, Timor-Leste kontinua servisu nafatin no hametin lasu amizade ho País membru ASEAN sira. Sekratariadu ASEAN akresenta mós ASEAN sei kontinua oferese kapasitasaun no asisténsia esensiál sira ba Ministériu relevante atu partisipa iha atividade ASEAN nian ba Timor-Leste.
ASEAN mak rejiaun ida ne’ebé ekonomia dinámika liu iha mundu no ne’e bele benefísia mós Timor-Leste, tanba ne’e agora halo ona esforsu boot hodi nafatin prienxe rekizitu sira no iha ligasaun di’ak ho País membru sira hotu.
Prezidente Repúblika, José Manuel Ramos Horta, aprezenta mós prosesu dezenvolvimentu ne’ebé daudaun ne’e la’o hela iha Timor-Leste, no kooperasaun ne’ebé Timor-Leste estabelese ho País avansadu sira hanesan Estadus Unidus Amérika, Japaun, Korea Súl no Xina inklui parseiru dezenvolvimentu sira hanesan ONU.
Prezidente ko’alia mós kona-ba integrasaun ekonómika Timor-Leste nian no potensiál investimentu iha Timor-Leste, no mós Timor nia prosesu adezaun ba Organizasaun Komérsiu Mundiál.
Ikus liu, Timor-Leste fiar katak maski prosesu adezaun iha kompleksidade oioin, iha 2023 “Prezidénsia Indonézia nian” Timor-Leste sai ona membru ASEAN.
Entretantu, molok hasoru malu ho Sekretáriu Jerál ASEAN, iha tuku 13.30, oras Jakarta, Prezidente Horta, vizita uluk Islamic State University of Syarif Hidayatullah Jakarta hodi halo palestra.
Hafoin remata, Prezidente Repúblika ho delegasaun arranka fali ba Kuartél Jerál Krús Vermella Indonesia (PMI) hodi halo enkontru ho Eis Vise Prezidente Indonesia no atuál Prezidente Krús Vermella Indonesia, Jusuf Kalla. Ekipa to’o iha kuartél Jerál PMI tuku 15:00, oras Jakarta, Enkontru durante minutu 30 nia laran.
Remata enkontru, PR Horta ho delegasaun Vizita Kuartél Jerál Sekretariadu ASEAN-Jakarta hodi enkontru ho Sekretáriu Jerál ASEAN, iha tuku 15:55 oras Jakarta, Enkontru dura durante besik oras ida.
PR ho ekipa husik hela Sekretariadu ASEAN tuku 16:40, oras Jakarta, kontinua kedan viajen ba Estúdiu TV KOMPAS, iha tuku 16:55, hodi halo entrevista espesiál.
Iha entrevista espesiál ho Kompas durante oras ida resin ne’e PR ko’alia kona-ba preparasaun Timor-Leste nian atu Adere ba ASEAN, Timor-Leste nia susesu ba prevensaun Covid-19, rekonsiliasaun entre País rua, inklui hametin kultura nasaun rua nian.
Hafoin entrevista espesiál remata, PR ho delegasaun fila fali mai Otél KEMPINSKI fatin ne’ebé Xefe Estadu deskansa. No iha tuku 19:00 kontinua kedan halo entrevista espesiál ho Metro TV, durante oras ida resin.
2,498 total views, 3 views today
Bele hare Video Seluk :
Subscribe to Timorpost
