Jakarta (Timor-Post)-Vizita ofisiál Prezidente Repúblika, José Manuel Ramos Horta, ho Delegasaun ba Indonézia, detetadu na’in-2 pozitivu Covid-19.
Tuir informasaun Timor Post, asesu hosi Protokolu Prezidente Repúblika nian, katak hosi teste ne’ebé halo horikalan, iha otél ne’ebé Xefe Estadu deskansa, ohin Tersa (19/07), hatudu Rezultadu delegasaun ne’e na’in-2, pozitivu vírus SARS-Cov Rapid Molecular Assay.
Delegadu Na’in rua ne’ebé pozitivu Covid-19 mak, Ministru Turizmu Komérsiu Industria (MTKI), José Lucas do Carmo no Xefe Casa Militár Prezidensia Repúblika, Renilde Guterres Corte Real.
Ho Rezultadu ne’e, agora sira labele akompana viajen PR Horta nian no deskansa de’it iha otel Indonézia KEMPINSKI.
Portantu regra Estadu Indonézia, katak ema ne’ebé atu asesu ba Istana Palásiu Prezidensiál, inklui PR Ramos Horta, tenke submete ba teste PCR.
Tuir ajenda Xefe Estadu ho delegasaun sei hasoru malu ho Prezidente Repúblika Indonesia, Joko Widodo, iha tuku 09:00 oras Jakarta.
Entretantu, ekipa delegasaun ne’ebe akompana Xefe Estadu husi Dili ba Jakarta mak hanesan Xefe Casa Sivíl, Xefe Casa Militár, husi parte Governu nian mak Ministru Transporte no Komunikasaun, José Agustinho no Ministru Turizmu Komérsiu Indústri, José Lucas do Carmo. Reprezentante Bankada Parlamentár kompostu Deputadu Mariano Assanami Sabino husi Bankada PD, Deputada Olinda Guterres husi Bankada KHUNTO, Deputada Domingas Barreto husi Bankada PLP, Deputada Nélia Menezes husi Bankada FRETILIN no Deputadu Patrocino Fernandes husi Bankada CNRT.
Alende ne’e, iha mós Prezidente Konsellu Imprensa, Virgilo Guterres ho ekipa, Prezidente CCI-TL Oscar Lima ho emprezariu nasionál balun, inklui Jornalista husi media Timor Post, STL, RTTL-EP, GMN no media online Hatutan.
2,491 total views, 6 views today
Bele hare Video Seluk :