DILI (Timor Post)-Diretór Servisu Migrasaun, Superintendente Asistente Polisia, Luis Soares Barreto, hatete Ministériu Públiku (MP), halo prosesu primeiru interrogatóriu ba sidadaun estranjeiru na’in-2 ne’ebé halo falsifikasaun dokumentu Estadu.
Nia hatete, sidadaun hirak ne’e halo, Servisu Migrasaun liuhusi operasaun rotina konsege deteta no halo kapturasaun ba na’in-rua ne’e husi Fujian-Xina, mane ida ho naran inisial WX tinan 33, no feto ida naran HSJ tinan 33, iha area hudi laran iha loron (06/07) tuku haat loraik.
“Sira detein 72 oras ona, no ohin loron lori ona ba Tribunal liuhusi Ministériu Públiku hodi halo Primeiru Interrogatóriu no Ministériu Públiku mak sei halo akuzasaun no ohin lokraik tama ona ba Tribunal no hein de’it desizaun husi Tribunal”, nia hateten iha servisu fatin, Ministériu Interior, Vila-Verde, Sesta (08/07).
Nia hatete, servisu migrasaun kaptura sidadaun na’in-rua ne’e tanba servisu loke rasik ajénsia ida no durante ne’e halo ona falsifikasaun ba dokumentu ofisial nasaun nian ho sira-nia karimbu rasik hodi halo vistu servisu no pareser legal nian.
Iha momentu ne’ebá kedas, sidadaun na’in rua ne’e rekoñese sira-nia aktu no parte migrasaun lori ba sede sentrál Migrasaun hodi foti identidade no entrega ba Komandu Munisípiu Dili hodi halo detensaun.
Antes ne’e, Komandante Munisípiu Dili, Superintendente Xefe Polisia Henrique da Costa, konfirma, sidadaun na’in-rua ne’e detein ona iha sela detensaun Komandu Munisípiu Dili, no kumpre ona 72 horas, nune’e loron ohin sira rua ba ona Tribunal Distritál Dili, ba Primeiru Interrogatóriu hodi nune’e hein desizaun final hosi Tribunal.
Entretantu evidénsia ne’ebé rekolla maka karimbu 113, kompostu hosi karimbu kompañia 86, karimbu Diretores 21, Karimbu Hospital Nasionál Guido Valadares 1, no restante husi sira-nia ajénsia.
“Ita rekolla mós evidénsia hirak ne’ebé iha no dokumentu balu, hanesan pasaporte, no Komputadór desktop hamutuk 5, laptop 1 no komandante operasaun ho nia membru sira lori ona evidénsia sira ne’e ba Ministériu Públiku. Ami hein de’it Prokuradór sira atu haree kazu ne’e ou fó kompeténsia ba se mak atu haree kazu ne’e no depois lori ba Tribunal no Tribunal sei deside bazeia ba lei ne’ebé iha” nia hakotu.
1,772 total views, 3 views today
Bele hare Video Seluk :