DILI—Batik Air nu’udar kompañia aérea privadu foun husi Indonézia ne’ebé hahú nia opeasaun dahuluk iha tinan 2013 husi Jakarta ba Manado. Batik Air nu’udar kompañia ne’ebé hahoris husi kompañia aérea Lion Air.
Diretór Ezekutivu Servisu Rejistu no Verifikasaun Emprezarial (SERVE), Florencio Sanches, haktuir, simu ona informasaun via e-mail hosi kompañia Batik Air atu halo operasaun iha Timor-Leste.
“Ami kontente aviaun ida bele disponivel tan halo kompetisaun iha aéreo nian iha Timor-Leste no ha’u rasik manda fali rekizitus rejistu negósiu iha SERVE ba sira,” Florencio ba Timor Post iha nia servisu fatin.
Entretantu Prezidente Autoridade Aviasaun Timor-Leste (AACTL), Ana Rosalia Ximenes Varela, mós hetan ona pedidu husi Batik Air.
“Ami simu ona sira nia dokumentus ne’ebé maka sira haruka liuhosi e-mail iha semana rua liu-ba, iha dokumentus ne’e rasik nia konteudu hakerek, kompañia Batik Air husu atu ami fó flight approval ba sira hodi halo operasaun iha Timor-Leste, maibé ami seidauk bele aprova. Ami tenke hasoru uluk na’in ba kompañia,” Prezidente AACTL hatete ba Timor Post iha nia servisu fatin.
Nia informa katak kompañia Batik Air mós diriji karta ba Navegasaun Aero Timor-Leste (ANATL) hodi husu oráriu no espasu semo nian, karik Denpasar mai Dili tuku hira no hosi Dili ba Denpasar nian.
Entretantu Ministru Transporte no Komunikasaun, José Agostinho da Silva, dehan, disponibilidade Batik Air halo operasaun ba mai Dili – Bali ne’e hatudu pasu di’ak ba governu Timor Leste bele dezenvolve setór aéreo maske neneik maibé bebeik.
Aviaun ne’ebé oras ne’e halo operasaun Dili-Bali mak hanesan, Merpati Air, Sriwijaya Air no Citilink Air. (jxy)
916 total views, 3 views today
Bele hare Video Seluk :