DILI—Embaixador na’in-sia ne’ebé iha loron Tersa (28/01/2020) simu posse husi Prezidente Repúblika, Francisco Guterres Lu-Ólo, iha Kuarta (29/01/2020) hasoru malu ho eis Primeiru Ministru Marí Bim Amude Alkatiri hodi husu nia hanoin.
“Objetivu ohin mai hasoru malu ho Doutor Mari Alkatiri ne’e inisiativa husi ami embaixador na’in-sia, katak molok atu sai husi Timor-Leste ba iha nasaun sira ne’ebé sai destakadu ba tenke hasoru hodi husu lider sira nia hanoin uluk lai,” hatuir Embaixador Timor-Leste ba Kambodia, Hermenegildo Lopes alias Kupa ba jornalista hafoin hasoru malu ho Alkatira iha nia rezidénsia Farol, Dili.
Nia haktuir, sai embaixador ne’e atu ba reprezenta estadu hanesan lalatak estadu nian, tanba ne’e sira ba hasoru líder nasionál no eis titular sira hodi husu hanoin.
Nia dehan, kuandu ba iha ema nia nasaun ne’e reprezenta nasaun Timor-Leste nia naran, la’os ba reprezenta partidu ka grupu ida nia naran.
Tan ne’e mak ho objetivu importante ida ne’e ami na’in-sia hasoru malu ho Alkatiri hanesan lider istóriku nia fahe informasaun lubuk ida ba sira.
“Doutor Alkatiri mós fó hanoin mai ami na’in sia katak kaundu ba ona iha ema nia nasaun sira ne’e tenke halo uluk identifikasaun ba potensialidade kada nasaun ne’ebé iha ba futuru ne’e bele fó mós benefísiu rai ida ne’e,” Kupa hatete.
Iha sorumutu ne’e mós Alkatiri husu ba embaixador na’in-sia atu labele laran susar ho situasaun atual ne’ebé akontese iha rai laran.
Lopes afirma, klaru atu reprezenta estadu hala’o servisu la ses husi embaixador sesante sira ne’ebé hala’o tiha ona.
Nia hatutan, molok tu aranka embaixador na’in Sia ne’e Mós sei hasoru malu ho eis prezidente Ramos Horta, hodi ninia opiniaun ka hanoin ruma.
Alende hasoru malu Ramos Horta sei hasoru malu mós órgaun soberanu Parlamentu Nasionál no ministeriu relevante sira Hanesan MAP, MTCI no seluk tan.
Entretantu Prezidente Repúblika (PR), Francisco Guterres Lú Olo, hameno pontu prinsipal tolu ba embaixador na’in-sia nu’udar xave atu reprejenta Timor-Leste nia naran iha nasaun sira destaka ba.
Pontu prinsiál tolu ne’e mak hanesan, emabizador sira tenke haklaken kona-ba pás iha Timor Leste, diálogu no prinsípiu sira ne’ebé iha ninia konsisténsia ba pás no onra iha ema hotu nia matan.
“Embaixadór tenke hatudu imajen nasaun ne’ebé nia reprezenta. Ita nia kooperasaun tenke ho nia baze prinsípiu maka instrumentu pás nian,” Xefe Estadu subliña iha nia diskursu bainhira fó posse ba embaixador na’in-sia, iha loron Tersa (28/01/2020), iha Palásiu Prezidensiál, Bairro-pité, Dili.
Xefe Estadu fó nia konfiansa tomak ba embaixadór sira sei susesu iha misaun ne’ebé idak-idak sei hala’o iha rai-li’ur.
“Ha’u iha esperansa katak imi hotu sei susesu iha serbisu ne’ebé mak imi sei hala’o iha kontestu misaun ne’ebé nasaun tau konfiansa atu hala’o iha estranjeiru,” Lú Olo hatete.
Embaixador /a extraordinária no plenipotensiáriu ne’ebé simu posse mak hanesan Maria Natália Guterres Viegas Carrascalão ba nasaun Singapura ho númeru dekretu Prezidensiál 13/2020, Hermenegildo Lopez ba nasaun Kamboja ho númeru dekretu Prezidensiál 14/2020, Juvita Rodrigues Barreto de A. Gonçalves ba Estadu Vatikanu ho númeru dekretu Prezidensiál 15/2020, Abrão dos Santos ba Repúblika Populár Xina ho númeru dekretu Prezidensiál 16/2020, Isabel Amaral Guterres ba nasaun Portugal ho númeru dekretu Prezidensiál 17/2020, Maria Renata Caldas de Jesus ba nasaun Laos ho númeru dekretu prezidensiál 18/2020, Inês Maria de Almeida ba nasaun Austrália ho númeru dekretu Prezidensiál 19/2020, Gil da Costa ba nasaun Reinu Unidu no Irlanda Norte ho númeru dekretu Prezidensiál 20/2020 no Ilídio Ximenes da Costa ba nasaun Japaun ho númeru dekretu Prezidensiál 21/2020.
Marka prezensa iha serimónia pose ne’e, Ministru Negósiu Estranjeiru no Kooperasaun (MNEK), Dionísio Babo Soares, Xefe Kaza Sivíl, espoza Prezidente Repúblika, Xefe Kaza Militár, funsionáriu Palásiu Prezidente Repúblika no família sira. (ato)
731 total views, 3 views today
Bele hare Video Seluk :
Subscribe to Timorpost
