DILI (timorpost.com) — Maski povu Timor-Leste maioria vida agrikultura, maibé semana ida ne’e hahú halerik ona ba folin foos ne’ebé sae entre 1 USD ate 2 USD, iha merkadu sira Dili no mós iha Munisípiu balu.
Tuir observasaun Timor Post iha Loja sira iha Dili, tantu empreza Xineza no Timoroan balu husi Loja sira iha Tasi-tolu, Budaran Komoro, Kampung Baru, inklui Armazena distributór balu iha Dili, kontinua fan foos.
Husi observasaun ne’e nota katak folin foos 20kg, Talimera 11,50 USD, gostu 13.50USD, manu vitoria 11,75 USD, globus 11,75 USD.
Enkuantu foos 25kg, manu vitoria 14,50 USD, globus 14,75 USD, Talimera 13,75 USD. Nune’e mós foos 30kg loja sira fa’an entre 16,75 USD ate loja balu fa’an 17,50 USD.
Bainhira entrevista ho kompradór Benisato Soares, nia husu ba Governu atu intervein folin nesesidade bázika sira fa’an iha loja Xineza, liuliu folin foos ne’e labele loron ba loron folin sa’e hela de’it, atu nune’e povu bele iha kbiit hodi sosa.
“Ha’u ohin sosa foos Talimera kilograma 20, ne’ebé uluk fa’an 10,50 USD, agora sa’e 11,50 USD balu to’o fa’an 12,00 USD, ami husu ita-nia Governu tenke kontrola didi’ak sasán sira fa’an iha loja sira liuliu loja Xineza sira atu labele loron ba loron hasa’e beibeik, atu ami povu kiik sira bele sosa sustenta ami-nia família”, nia informa, hafoin sosa foos iha loja Xineza ida Kampung Baru, Sábadu (21/01).
Nia afirma, hanesan servisu na’in iha area konstrusaun saláriu ne’ebé nia simu 135 USD hodi sustenta família uma laran ema na’in hitu ne’e lato’o, tanba dala-ruma nia sosa foos fulan ida karon rua no nesesidade sira seluk iha uma laran la sufisiente.
Iha fatin ketak bainhira Kios na’in husi Munisípiu Lautem, Aires Pinto, informa sasán agora ne’e karun hotu ne’ebé sira ladún sosa barak tanba modal ne’ebé sira iha lato’o atu sosa hotu sasán sira ne’e ba fa’an iha area rural ne’ebá.
“Folin sasán ne’ebé sa’e halo ami mai sosa iha armazena ne’e folin sa’e hotu, entaun ami-nia modal la to’o atu sosa barak, uluk ami lori dolar amerika rihun lima (5.000 USD) mai ne’e sosa sasán karreta truk nakonu más agora la’e”, Aires informa iha Armazena Perisos Hudi Laran.
Nia hatete, liuliu foos ne’ebé sira sosa iha armazena, globus 25 kg ho folin 12,75 USD, foos marka Gostu ne’e maka folin 13,00 USD, ne’ebé sira tula ba Lautem aluga karreta 350,00 USD sei fa’an entre 14,50 USD ate 16,50 USD.
“Ami ba fa’an fali konta ho aluga karreta nian entaun globus ne’e ami fa’an 14.50 USD no foos Gostu ne’e maka ami fa’an 16.50 USD”, Kios na’in Aires esplika.
Tanba tuir nia haree loja boot sira fa’an foos iha Munisípiu Lautem ne’e, balu fa’an entre 16,00 USD, balu fa’an to’o 17,00 USD ba foos karon 25 kg, maibé foos 30kg nia labele sosa ba fa’an tanba povu iha area rural ne’ebá laiha kapasidade atu sosa, tanba folin iha loja boot sira fa’an entre 19,00 USD ate balu fa’an to’o 21,50 USD.
2,040 total views, 9 views today
