DILI (Timorpost.com) – Atu dezenvolve finanseiru iha Timor-Leste (TL), Instituisaun Finanseiru KAEBAUK, Tersa (10/01), asina nota entendimentu ho Lembaga Pengembangan Perbankan Indonesia (LPPI).
“Ohin hanesan oportunidade ida ne’ebé di’ak tebes, KAEBAUK nu’udar instituisaun finanseiru ida tenke adapta aan ba mudansa ne’ebé akontese beibeik iha Timor-Leste”, hateten Diretór Ezekutivu KAEBAUK, Angelo Soares, liuhosi diskursu iha salaun KAEBAUK Bebonuk.
Nia dehan, tuir KAEBAUK ninia planu ka estratéjia tinan ida ne’e ko’alia kona-ba kapasita staff, ne’e importante tebes.
Diretór ne’e afirma, objetivu asina akordu ne’e iha atividade rua hanesan, estudu reabilidade no kapasita staff sira, hodi hametin servisu KAEBAUK nian iha futuru.
“Tuir mehi KAEBAUK nian ba oin hakarak transforma aan, la’ós atu kontinua nafatin hanesan ho instituisaun mikro finansas, maibé sei hakat espasu ida ba oin katak, ami bele transforma aan makro finansas bens iha Timor-Leste”, nia promete.
Nia haktuir, husi estudu reabilidade no kapasita staff ne’e importante tebes nune’e identifika problema iha ne’ebé, karik area balun iha erru entaun presiza hadi’a, nune’e KAEBAUK hakat ba oin ho susesu.
Nia esplika, ko’alia kona-ba mikro finansas, staff sira kompriende di’ak ona, presiza kapasita tan sira liuliu general baking ba staff oinsá halo operasaun banku nian.
Entretantu partisipante másimu iha serimónia asina nota entendimentu ne’e hanesan, Diretór Ezekutivu KAEBAUK, Angelo Soares, Diretora Lembaga Pengembangan Perbankan Indonesia (LPPI), Ibu Retno Wahyuni Wijayanti no staff sira.
1,528 total views, 12 views today
