DILI (timorpost.com) – Diretór Ezekutivu Asosiasaun Halibur Defisiensia Matan Timor-Leste (AHDMTL), Gabriel Ponsiano de Souza, informa membru AHMDL uma-kain hamutuk 22 asesu ona subsídiu fim do ano 200 USD.
Nia hatete, durante distribuisaun sira halo observasaun iha Dili no Munisípiu sira, família defisiensia sira asesu hotu laiha diskriminasaun, maibé pagamentu iha Munisípiu Aileu mosu dezentendimentu husi komunidade balun hakarak koa defisiente sira-nia osan.
Nia haktuir, iha distribuisaun subsídiu defisiénsia balun asesu, maibé balun laiha, nafatin buka informasaun razaun saida maka sira balun la asesu ba subsídiu refere.
“Iha asosiasaun ne’e, iha defisiénsia matan uma-kain hamutuk 23, maibé uma-kain 22 maka asesu, uma-kain ida la asesu tanba naran la sai, maibé sei tama iha reklamasaun, tanba hotu-hotu iha direitu hanesan atu asesu ba subsídiu ne’e”, dehan nia ba Timor Post Online, via-telefone, Tersa (27/12).
Nia hatutan, tuir deklarasaun husi Governu katak, sei la simu lista reklamasaun uma-kain sira ne’ebé seidauk simu subsídiu 200 USD, maibé nafatin ezije ba Governu atu konsidera lista reklamasaun tanba uma-kain hotu-hotu iha direitu hanesan.
“Ami nafatin ejize ba parte relevante sira ne’ebé la halo pagamentu ba uma-kain ne’ebé naran laiha lista, tenke konsidera hanesan reklamasaun hodi halo pagamentu”, nia hato’o.
Diretór ne’e informa, uma-kain defisiénsia ne’ebé la asesu ba subsídiu Fim do Ano, membru asosiasaun sira sei dezloka kada Munisípiu sira hodi buka tuir uma-kain hira ladauk asesu ba subsídiu refere.
“Ami sei dezloka ba Munisípiu hodi akumula hamutuk relatóriu sira kona-ba defisiénsia ne’ebé la asesu ba subsídiu ne’e, hodi hato’o ba parte relevante sira hodi halo pagamentu hanesan reklamasaun”, hakotu nia.
Enkuantu, Governu lansa no halo distribuisaun subsídiu 200 USD, hahú iha loron 06 Dezembru, no Munisípiu sira iha loron 12 Dezembru tinan ida ne’e
Alende ne’e, dadus finál husi Ministériu Administrasaun Estatál (MAE), ne’ebé Submete mai iha Ministériu Solidariedade Sosiál no Inkluzaun (MSSI), total uma-kain hamutuk 39.952 ho osamentu bilaun 7.8 USD.
Entretantu, Governu halo ona pagamentu ba benefisiáriu uma-kain hamutuk rihun 45 resin iha territóriu Nasionál.
1,571 total views, 3 views today
Bele hare Video Seluk :