Dili (timorpost.com) – Benefisiáriu subsídiu fim do ano 200 USD, hato’o agradese ba Oitavu Governu, tanba bele ajuda ona sira festeza Natal no Tinan Foun.
Sentimentu hirak ne’e benefisiáriu sira espresa hafoin simu subsídiu fim do ano 200 USD, iha sede suku Komoro, Sesta (23/12).
Benefisiária, Romana da Silva, hatete nia sente orgullu no hato’o agradese ba Oitavu Governu, ne’ebé implementa programa subsídiu fim do ano.
“Hanesan sidadaun ha’u sente orgullu no agradese ba ita-nia Governu, tanba foin primeira vés Governu ida ne’e implementa programa subsídiu fim do ano ba ami povu ki’ik sira uza osan ne’e hodi festeza Natal ho tinan foun”, nia hateten.
Nia dehan, programa ida ne’e ajuda tebes ba povu iha fim do ano, tanba ne’e husu Governu tenke kontinua implementa tinan-tinan, nune’e timoroan sira ne’ebé rendimentu menus hosi 500 USD, bele kontente ho família.
Iha fatin hanesan benefisiáriu Rui Herman Neves, reforsa maski subsídiu 200 USD, ne’e la barak, maibé bele rezolve povu ki’ik sira-nia problema uma laran.
“Ha’u hanoin subsídiu ida ohin ami simu ne’e maski la barak, maibé bele ajuda rezolve ami-nia nesesidade uma laran nian iha tempu natal no simu tinan foun”, nia informa.
Nia esplika, nu’udar xefe família la’ós hein de’it subsídiu fim do ano, maibé hanesan traballadór saláriu ne’ebé nia simu hodi susteba uma laran, dala-ruma fulan ida ne’e lato’o.
Tanba ne’e Rui, husu ba Oitavu Governu, lideradu Jenerál reformadu, Taur Matan Ruak, bele kontinua programa fahe subsídiu fim do ano ne’e.
Alende ne’e, nia sujere ba Governu para halo kontinuidade bele aumeta valor hosi 250 USD ba leten. Tanba osan ida agora ne’e la to’o ba família balu ne’ebé to’o ema na’in-12.
2,457 total views, 3 views today
Bele hare Video Seluk :