DILI (timorpost.com) – Xefe Suku Bekora, Postu Administrativu Kristu Rei, Munisípiu Dili, Antonio da Silva Soares, informa aldeia rua hanesan Uma tolu ho Mahukmate, seidauk asesu subsídiu fim do ano 200 USD.
Nia hatete, iha Suku Bekora, iha aldeia 10, hanesan aldeia Auhun, Bekusi sentru, Bekusi kraik, Klakfuik, Kakeu Laran, Darlalo, Mahukmate, Uma tolu, Rou, no Berblitu ho uma-kain totál 3369 mak asesu ona subsídiu fim do ano.
“Ami hela aldeia rua ho uma-kain totál liu 1000 mak seidauk asesu subsídiu fim do ano 200 USD,” nia dehan lia hirak ne’e ba Timor Post Online, iha nia knaar fatin Sede Suku Bekora, Domingu (18/12).
Nia hatutan, aldeia uma-tolu ho maukokomate seidauk asesu la signifika iha difikuldade ne’e lae, maibé sira ne’e hahú Segunda (19/12) mak asesu.
“Tanba ami iha aldeia 10, entaun ami atende uluk aldeia 8, hafoin mak ami ba fali aldeia rua ne’ebé seidauk asesu,” nia informa.
Nia hateten, suku Bekora iha momentu ne’e sira-nia parte haruka lista uma-kain hamutuk rihun 5 resin, maibé hafoin sira simu lista Ministériu Administrasaun Estatál, (MAE) iha de’it uma-kain rihun 4 resin.
“Tanba ne’e, ha’u konfirman ho sira, Maibé sira dehan lista reklamasaun sei laiha, tanba ne’e ita hein, tanba sira fó tempu 14 dias atu akaba fahe subsídiu ne’e, hafoin subsídiu fim do ano mak ita rona fali iha lista reklamante ka lae,” nia hateten.
Xefe Suku Bekora, haktuir tanba osan subsídiu fim do ano, Governu bandu atu funsionáriu sira-nia saláriu 500 ba leten atu asesu, tanba ne’e ema funsionáriu barak sei la simu subsídiu ne’e.
“Ami la bandu funsionáriu sira atu simu subsídiu fim do Ano, karik sira hakarak simu ami fó formuláriu ba sira hodi Lee, hafoin prienxe, tanba dekretu lei hakerek hotu iha laran, tanba tuir funsionáriu ida-idak nia konxiénsia hakarak simu ou lae,” nia dehan.
Maibe, karik aban-bainrua KAK identifika mak pesoal ne’e ba hatán, mais durante fahe subsídiu ne’e la mosu krime ruma iha ne’e, atendiementu la’o di’ak loos.
Alende ne’e nia dehan, durante sira fahe subsídiu ba uma-kain sira ne’e, parte Provedoria Direitu Umanus no Justisa (PDHJ) ho Komisariu Anti Korrupsaun (KAK), mai halo monitorizasaun, maibé la mosu krime ruma iha ne’e.
Ikus nia dehan, uma-kain balun seidauk simu subsídiu fim do ano 200 USD, sira seidauk bele fó sai númeru serteza.
1,613 total views, 3 views today
Bele hare Video Seluk :