ADVERTISEMENT

SEFOPE Konsideradu Buka Lukru, Abandona Traballador Rihun Ida Resin Iha Korea-Australia

Mario da Costa - Ekonomia
Jornalista : Estaziadu Jacinto Caet
Editor : Mário da Costa
  • Share
Traballadór Timoroan sira prepara atu ba servisu iha Austrália no Korea, Imajen Esp.

DILI (timorpost.com) – Sosiedade Sivíl Luta Hamutuk (LH), konsidera Sekretáriu Estadu Formasaun Profisional no Empregu (SEFOPE), Kada tinan haruka trabalhador timoroan ba servisu iha Australia no Korea do Sul, buka Lukru (osan), maibé la hanoin buka solusaun ba timoroan besik rihun ida resin abandona no sai ilegal iha ema nia rai.

Diretór ezekutivu Luta Hamutuk (LH), Jose Alves da Costa, hatete relasiona ho traballador timoroan servisu iha rai-liur kada tinan Governu haruka ba beibeik, maibé trabalhador kontinua sai ilegal no abandona iha ema nia rai no númeru aumenta.

ADVERTISEMENT
SCROLL FILA BA NOTISIA


“Ha’u hanoin ida ne’e loloos responsabilidade SEFOPE nian liuliu sira ne’e servisu iha Korea do Sul no Australia, tanba Governu mak haruka ba, nune’e tenke hatene sidadaun ne’e ninia paradeiru, kondisaun oinsá labele fase liman timoroan sai ilegal, maibé la fasilita sira, maibé hanoin mak lukru (osan) hodi abandona trabalhador timoroan ne’ebe moris ilegal iha ema nia rai, ne’e ameasa ida ba sira-nia vida”, dehan nia iha servisu fatin Faról, Kinta (15/12).

Nia haktuir, traballador Timoroan besik rihun ida resin mak sai ilegal iha ema nia rain hanesan, Australia hamutuk na’in 400 Korea do sul nain 700, ne’e bele ameasa ba ema nia vida, tanba iha ema nia nasaun aplika lei, bainhira kaptura bele multa no tama komarka.

“Entaun SEFOPE iha responsabilidade moral buka tuir hodi rezolve traballadór hirak ne’e sira-nia problema labele mak fase liman (buka osan), depois kontinua haruka traballadór sira ba nafatin, maibé númeru ilegal kontinua sa’e”, dehan nia.

Lee Mós :
Hametin Relasaun Bilaterál, PM Taur Halo Vizita ba Australia

Portantu nia dehan, SEFOPE hakarak rekruta Timoroan servisu iha Australia no Korea do sul tenke hatene tuir traballador ne’ebé ilegal haruka fila mai Timor-Leste mak haruka fali traballadór seluk ba fali.

“Labele haruka tiha na’in 100 ba servisu iha Korea do sul no Australia, maibé la buka tuir rihun ida resin ilegal, maibé kontinua aumenta tan traballadór ba iha rai li’ur”, nia lamenta.

Tanba ne’e, José konsidera SEFOPE laiha responsabilidade ba traballadór Timoroan ne’ebé sai ilegal iha ema nia rain ne’ebe SEFOPE haruka.

“Ha’u husu ba SEFOPE atu responsavel ba traballadór ne’ebé sai ilegal, husu mós ba inan-aman sira ne’ebé nia oan sira moris la seguru ona iha ema nia rai, tanba ilegal favor hato’o ba parte relevante sira”, nia sujere.

Ho nue’e, nia parte mós husu ba Prezidente Repúblika, José Ramos Horta no Primeiru Ministru, Taur Matan Ruak, buka solusaun ba traballadór Timoroan rihun ida resin sai ilegal iha ema nia rain.

Molok ne’e, iha tinan 2020, SEFOPE rejistu ona traballador Timoroan servisu iha Australia kuaze na’in 400 Sai traballadór Ilegal.

“Kona-ba problema ne’e ita hotu hatene, SEFOPE rejistu ita-nia traballadór Timoroan lubuk ida mak halai sai husi sistema iha Australia kuaze nain 400 ho razaun sira hasai sees husi sistema tanba impaktu husi Covid-19 mosu, bainhira atividade iha Austrália lala’o”, dehan Diretór Diresaun Nasionál Emprego Exterior, Filomeno Soares, iha Timor Plaza, Suai Room, Tersa (13/12).

Lee Mós :
SEII Presiza Apoiu Fundu Ba Organizasaun Feto

Nia afirma, daudaun ne’e ho situasaun covid-19, hahú la’o normal ona. Tanba ne’e, SEFOPE hahú servisu hamutuk ho Governu Australia hodi esforsu maka’as liuhusi buka dalan ba sira no fó motivasaun ba sira, oinsá labele sees an husi sistema no labele sai traballadór ilegal.

“Agora Governu iha ona politika oinsá haree buka dalan hodi fó akonselamentu ba sira para labele halai sees husi sistema, bainhira sira hasai sees husi sistema ne’e risku ba sira”, dehan nia.

Filomeno esplika, bainhira traballadór ne’ebé sai ona ilegal signifika sira lakon kona-ba asuransia saúde nian no mós servisu iha Australia, tanba sira-nia asuransia sira ne’e liga ba empregadór ne’ebé halo kontratu ho sira.

Traballadór hirak ne’e sai ilegal sira lakon servisu no mós sira-nia mobilizasaun iha Austrália klot, imigrasaun sei buka tuir atu kaptura nune’e haruka fila mai Timor-Leste.

“Maibé, Governu sei la tur nonok loos de’it sei buka solusaun liuhusi servisu hamutuk embaixada Australia nian no mós reprezentante adido traballadór iha Austrália oinsá buka dalan redus problema hirak ne’e”, katak nia.

Nia informa, daudaun ne’e, traballadór kuaze na’in 10 mak fila ona mai Timor-Leste tanba sira hetan moras, bainhira sira envolve ba aktu hirak ne’e sei fó risku ba nia aan no mós Família.

Lee Mós :
Xanana: "Ha'u Triste Bainhira Rona Falesimentu Shiley Shackleton"

Entretantu, hahú inisiu fulan Janeiru to’o Outobru 2022, SEFOPE haruka ona Traballadór Timoroan na’in 2739, kompostu mane hamutuk na’in 1933 no feto na’in 806.

Filomeno hatutan, la’ós de’it Traballadór Timoroan ona sira ne’e servisu iha Australia mak sai Ilegal, maibé traballadór sira ne’e servisu iha Korea do Sul nain 700 mak sai ilegal.

“Iha Korea do Sul nian, tuir baze dadus husi ita-nia reprezentante husi Ministériu Traballu Korea nian iha Timor-Leste relata, hahú iha tinan 2009 to’o agora, kuaze traballadór timoroan servisu iha korea do sul hamutuk 700 sees husi sistema no sai traballadór ilegal”, Dehan nia.

Nia dehan, traballadór hirak ne’e sai ilegal la’ós laiha ona servisu, maibé sira sei nafatin servisu iha emprezáriu seluk, no traballadór sira ne’e nafatin haruka nafatin osan mai familia sira.

“Ami sempre fó hanoin ba sira katak, imi deside sai traballadór ilegal, maibé imi haree atividade ne’ebé empregadór fó ne’e durasaun hanesan kontratu uluk ne’e ka lae, keta semana ida de’it atividade hotu ona ne’e hamate sira atividade, maibé ita-nia alin sira sempre kontra”, nia enkoraja.

Enkuantu, hahú husi tinan 2009 to’o iha tinan 2022, SEFOPE haruka ona Traballadór Timoroan servisu iha Korea do Sul hamutuk na’in 4.457.

 3,218 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “SEFOPE Konsideradu Buka Lukru, Abandona Traball…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No