DILI (timorpost.com) – Inan faluk Feliciana Mendonça, mak negosiante ne’ebé bai-bain fan sasán rahun iha dalan ninin, iha area Eis Merkadu Lama nian.
Nia hatete, fan sasán iha area Merkadu Lama ne’e, la’ós fatin permanente no fan sasán rahun iha estrada ninin, tanba de’it oan nain-rua nia presiza loron-loron no mós nesesidade uma laran.
“Ha’u fan sasán iha ne’e, tanba de’it nesidade uma laran mak obriga, nune’e mós ha’u-nia oan nain-rua nia presiza, ha’u-nia laen kaben mate ona, nia husik hela oan na’in-haat, maibé oan nain rua mate ho nia aman hela na’in-rua mak sei moris,” nia hateten ba online Timor Post ho iin triste, Domingu (04/12).
Nia dehan, daudaun nia okupa de’it trotua leten mak fan sasán sira, tanba fatin ba nia laiha hodi fan.
“Ha’u tenke fan besik iha area Kaikoli, tanba ha’u kondisaun moras hela, ha’u la bele la’o dook, kuandu la’o dook oin halai, tanba ne’e nia fan besik area Kaikoli nian, atu nune’e fasil ba ha’u atu fila ba uma,” nia konta.
Nia informa, fan sasán tuur iha ne’e, ema hola barak liu 2 USD, nune’e mós dala-ruma menu husi osan ne’e.
“Ha’u fan de’it bua, ahu, malus, no has, ha’u hola ema seluk nian mak ha’u fan, ha’u tenke fan, atu nune’e bele rai hamutuk hodi hola nesesidade bázika iha uma laran”, nia afirma.
Nia hateten, sasán sira ne’e hola iha Merkadu Taibesi, hafoin nia fan fali iha estrada ninin, ho montante 0,50 no 1 USD.
Ikus nia dehan, hela iha Dili ne’e, tenke buka moris, tanba buat hotu hola ho osan.
2,143 total views, 9 views today
Bele hare Video Seluk :
Subscribe to Timorpost
