DILI (timorpost.com) — Primeiru Ministru (PM), Taur Matan Ruak, konsidera taxa importasaun ne’ebé aplika iha Portu Tibar, ne’e razoavel.
Nia hatete, Ministériu Finansas ho Portu Tibar presiza hasoru malu ho emprezáriu sira hodi esplika razaun kona-ba presu ka taxa importasaun iha Portu Tibar rasik.
“Ita bainhira serbisu di’ak, lalais nia presu mós tuir ida ne’e, uluk iha Portu Dili ita bele hein to’o semana rua to’o fulan tomak ne’e nia presu oin seluk, maibé agora fasil no lalais tebes nia presu mós tuir ida ne’e,” nia hateten hafoin enkontru ho Xefe Estadu iha Palásiu Prezidensiál, Bairru-Pité, Kinta (01/12).
Tanba ne’e, nia husu atu parte Portu Tibar nafatin iha komunikasaun ho emprezáriu sira atu haree, maibé ida ne’e negósiu selu tuir sira-nia prestasaun serbisu.
“Ha’u hanoin nia implikasaun ba sasán folin sa’e iha merkadu nasionál laiha, tanba Timor-Leste aplika sistema merkadu livre, hanesan sasán ne’ebé ita sosa iha Bali ho folin $100 mai to’o Timor $200,” Xefe Governu afirma.
PM Taur subliña, ne’e tanba ema sosa barak maibé fan uitoan, entaun nia folin sa’e, bainhira ema sosa laiha sasán rai de’it konserteza nia folin sei tuun.
“Ha’u hanoin antes portu ne’e hahú sira hatene ona katak ida ne’e risku ida, halo nusa mak Portu ne’e hotu tiha, sira sei ko’alia nafatin buat ne’ebé konsekuénsia husi desizaun Governu nian kuandu hari Portu ne’e,” PM Taur dehan.
Antes Xefe Governu hakotu, afirma tan katak, kuandu hari Portu, nia konsekuénsia mak ida ne’e, katak nia moderniza, nia reduz serbisu, hadi’a efisiénsia, efikásia no rapidés tanba ne’e sira tenke preparadu para simu ida ne’e.
Alende ne’e mós iha horisehik 30/11/2022, CEO Bolloré Port, Phillipe Labonne, hatete kona-ba prosedor, sistema serbisu iha Portu Tibar uza sistema ne’ebé eletróniku hotu, nune’e Portu ne’e operasaun transparan, tan ne’e agora koko atu labele uza Paperless ne’ebé sistema ne’e modernu teb-tebes.
“Kona-ba presu ita labele haree ba komparasaun presu Portu Dili ho Tibar nian, tanba kondisaun la hanesan, maibé intensaun saida mak ita halo, maibé investimentu entre setór privadu ho públiku halo investimentu hamutuk, kria fasilidade ne’ebé modernu tuir standar Internasionál no bele fasilita ka atrai Ro boot sira ne’ebé aban-bairua sei mai,” nia afirma.
Nia aumenta, bainhira Ró barak sei mai, entaun sei iha kompetisaun, kompetisaun karik iha duni, sei hatún presu ba ne’ebé selu Ró ne’e, nune’e mak parseiru entre Governu ho setór privadu nia hanoin ba planu nia hanoin ba futuru.
“Presu ne’ebé sa’e iha Portu Tibar la’ós tanba atendimentu ne’ebé di’ak, maibé tanba Portu Tibar iha hela investimentu nia laran no ko’alia kona-ba investimentu presiza recover fila fali ka foti fila fali osan ne’ebé halo investimentu,” nia relata.
Entaun tenke ser iha kustu ba ida ne’e no empreza hanoin ona atu buka iha kompetitor ne’ebé makaas, para bele hatún presu aluga Ró, nune’e bele hatún kustu ba buat seluk ne’ebé sei lori impaktu pozitivu ba Timor tomak.
3,124 total views, 3 views today
Bele hare Video Seluk :
Subscribe to Timorpost
