Dili (timorpost.com) – Kámara Komérsiu no Indústria Timor-Leste (CCI-TL), servisu hamutuk ho UN Women hala’o serimónia asina akordu kona-ba feto Emprezária sira iha Munisípiu tolu hanesan Dili, Likisá no Manatutu.
Head of Office ka Xefi Misaun UN Women iha Timor-Leste, Amy Nishtha Satyam, hatete ohin loraik hanesan faze primeiru entre CCI-TL no UN Women halo asina akordu kona-ba oinsá atu halo kapasitasaun ba feto Emprezária sira.
“Ba Etapa ida ne’e ami tarjetu ba feto Emprezária 100 liu ne’ebe iha Munisípiu no fiar katak ida ne’e sei responde ba krize Mina folin agora sa’e ona, no folin hahán sa’e, tanba ne’e etapa primeiru, hasa’e kapasidade ba feto Emprezária sira”, nia hateten hafoin Serimónia asina akordu iha CCI-TL, Kuarta (30/11).
Nia dehan, ida ne’e la’os kapasitasaun de’it, maibé sira suporta ba material no Ekipamentus balun ne’ebé fasilita sira-nia servisu.
“Ami asina akordu de’it ba Munisípiu tolu ne’e hanesan ezemplu ida ba ami para ami bele fó treinu tránzitu, tuir mai sei halo expansaun ba iha Munisípiu sira seluk. Tanba objetivu husi UN Women atu fó kapasitasaun ba iha feto Emprezáriu sira iha Munisípiu iha Timor-Leste”, nia tenik.
Enkuantu Formasaun ida ne’e CCI-TL mak fó formasaun ba Emprezária sira ho durasaun fulan tolu komesa ohin, formasaun ne’e sira fokus liubá iha literasia, Finansas, planu bisnis, negósiu no oinsá atu halo merkadoria ba Produtu.
Iha fatin hanesan Vise-Prezidente Fortalesimentu Mulheres Emprezarial CCI-TL, Jacinta Abu Cau Pereira, reforsa tan katak iha loraik ida ne’e sira asina akordu hanesan etapa primeiru ba CCI-TL, istória ida ba Prezidente foun no sinal di’ak ba feto sira.
“Tanba ne’e ami agradese ba Un Women ne’ebe hamutuk CCI-TL hanesan parseiru atu bele hala’o formasaun Kona-ba feto Emprezaria sira iha Munisípiu Dili, Likisá no Manatutu, ne’ebé liuhusi asina akordu ida ne’e bele hanesan sinal ida foin atu hahú maibé sei iha kontinuasaun iha Munisípiu sira seluk no mós ita-nia feto sira liuliu ba feto Emprezária sira”, Nia hakotu.
1,888 total views, 3 views today
Bele hare Video Seluk :