DILI (timorpost.com) – Atu sustenta moris família nian, negosiante ai-leba Daniel Sequeira, deside fan sasán tradisionál haleu sidade Dili.
Nia hatete, fan sasán tradisionál ne’e, tanba de’it atu sustenta moris loron-loron nian.
“Ema moris iha mundu ne’e, halo buat ruma hafoin bele han, nune’e mós ita atu hola sasán ruma presiza osan,” nia hateten ba online Timor Post iha Kolmera, Domingu (27/11).
Nia dehan, sasán sira ne’e dala-ruma fan loron tomak mós ema la hola, dala-ruma mós ema hola ho tempu ne’ebé naruk hafoin bele hotu.
“Ha’u tenke fan sasán ida ne’e, tanba ida ne’e mak tuir ha’u-nia forsa, tanba kaman no ha’u bele lori la’o iha Dili laran, maski loron tomak ema la hola,” nia konta.
Nia esplika, nia ema husi Hera, mai hola sasán iha Taibesi hafoin nia fan, sasán sira ne’e, nia fan husi dadeer to’o lokraik mak nia foin fila ba nia hela fatin.
“Sasán sira hanesan, Luhu, Bote, Lafatik no seluk-seluk ne’e, ha’u hola 10 ho osan montante 14 USD, hafoin nia faan fali ida 2 USD,” nia haktuir.
Alende ne’e nia dehan, uluk nia fan akar no seluk-seluk tan, maibé tanba nia mós idade ona entaun fan saida mak tuir nia forsa, tanba ne’e, daudaun nia faan sasán tradisionál sira ne’e.
1,858 total views, 3 views today
Bele hare Video Seluk :
Subscribe to Timorpost
