DILI (timorpost.com) – Ministru Agrikultura no Peskas (MAP), Pedro dos Reis, rekoñese kompañia sira ne’ebé fornese ai-han ba sidadaun sira iha Kuarentena durante períodu COVID-19, balun Governu seidauk halo pagamentu.
“Iha Ministériu laiha problema tanba ami haruka hotu ona pesoál no kompañia sira-nia naran no númeru ba hotu ona Ministériu Finansas, atu halo pagamentu ba sira,” dehan Ministru Agrikultura no Peskas (MAP), Pedro Dos Reis, iha Parlamentu Nasionál, Kuarta (09/11).
Maibé, nia dehan, tarde ona entaun Ministériu Finansas husu fali rekizitu sira hanesan karta legál ruma haree ba jurídiku, atu haree ba oinsá trata subsídiu ba sira-nia Catering sira ne’e, ne’ebé prosesu la’o hela.
“La’ós ami mak haruka dadus tarde ba Ministériu Finansas, lae, maibé iha mudansa buat balun inklui mós orsamentu sira ne’e hotu no tenke prenxe rekizitu, orasida ha’u foti fó de’it ikus mai ha’u mak kulpa fali,” hateten nia.
Tuir informasaun kompañia sira durante fornese ai-han no Catering ba Kuarentena ne’e, fulan 11, seidauk selu maibé Ministru ne’e hatán sira selu ona sorin hela sorin mak seidauk.
“La’ós fulan 11, hela de’it fulan neen ida hanesan ne’e mak seidauk selu, tanba iha mudansa ne’e mak ita tenta buka atu hadi’a, maibé hotu-hotu tenke pasiénsia ita tenke tuir dalan di’ak atu labele prezudika fali ema ida, maibé Governu kompromete tenke selu sira tanba ida ne’e sira-nia direitu,” nia hakotu.
Governante ne’e subliña, sei selu maibé tuir prosesu legál sira ne’ebé mak iha, atu bainhira mak selu nia parte la dehan, maibé sei selu tanba dadaun ne’e prosesu sei la’o hela.
857 total views, 3 views today
